Crisis Management Office (CMO) yama anteriormente como Bureau Rampenbestrijding (BRA) ta informa a traves di su rednan social cu Nacionale Academie voor Crisisbeheersing ta bay ofrece cursonan den formato di e-Learning pa tur persona interesa den cursonan pa Maneho di Crisis.
Na october ultimo a informa riba e cambio di nomber di e departamento aki caminda BRA tabata enfoca riba e momento cu un calamidad presenta y con pa prepara e hendenan pa atende cu desaster. Na 2014 Nacionnan Uni a proclama cu mester cambia e maneho di desaster pa maneho di riesgo pero BRA y Aruba, como mayoria pais di mundo, no tabata cla pa haci e cambio aki. Mientrastanto cu BRA a dedica pa haci tur e cambionan y structura full Aruba, BRA a prepara tur e plannan y djey a pasa pa e parti di digitalisacion. Pero 2020 tabata un di e añanan cu a pone un brake riba e desaroyo pa BRA bay di un instancia cu ta deal cu desaster pa un instancia cu ta midi risiconan.
Curso:
Un persona cu ta interesa pa participa den e modulo di E-learning lo tin cu manda un mail na e account di e-mail di nac@minjenv.nl caminda cu ta solicita pa e por haya e aprobacion pa asina por sigui e cursonan online. Lo ricibi bek un mail caminda ta confirma su registracion y asina por cuminsa sigui dicho cursonan.
Pa participa:
Tur persona cu tin e interes pa engrandece nan conocemento riba e tema maneho di crisis. Por haya e informacion con e sistema di atende un crisis den tur e paisnan den Reino Hulandes.
Beneficionan:
E plataforma ta brinda e oportunidad pa cera conoci con cada pais ta atende ora crisis pero tambe pa den caso cu un pais ruman mester yuda otro, e persona cu ta bay na dicho pais por tin e conocemento di con e structura den dicho pais ta. E plataforma ta brinda e oportunidad pa den caso cu mester brinda ayudo, kende ta e personanan cu cual nan lo tin cu atende y tambe kende ta responsabel.
