Diahuebs anochi, tabata reina un ambiente total den Compleho Deportivo Frans Figaroa na Noord, unda cu a tuma luga e partido final di e di 19 edicion di Copa Betico Croes.
E audiencia den e stadion por a presencia e suspenso di e wega final entre ekipo di Nacional y Dakota cu a bataya pa conkista e titulo maximo di e torneo. Un stadion yena cu fanatico pa duna sosten y apoyo na nan ekipo faborito. Sigur e tabata un tremendo partido, unda ambos ekipo a destaca. E partido a termina cu e score di 2-0 pa ekipo di Nacional cu golnan anota pa Jastin Congo y Devis Oliveros. Esaki sigur tabata un momento historico pa prome biaha den 19 aña cu Nacional a titula campeon di Copa Betico Croes.
Na final di e anochi a haci entrega di e trofeo, acompaña pa Minister di Deporte, Mr. Endy Croes, na e ekipo campeon di Copa Betico Croes 2024.
