E tema cu nos lo dedica nos mes e siguiente lunanan binidero ta uno asina amplio, potente y controversial cu e ta dificil pa resumi den te hasta full un serie di articulonan. Nos ta papiando di e Revolucion den Inteligencia Artificial.

Un tendencia tecnologico cu lo cambia tur faceta di sociedad. Tambe e ta trece preguntanan filosofico di e nivel mas profundo. Den e prome articulo aki nos ta purba introduci e tema aki den un manera balansa y amplio. Pa asina nos nabega e añanan y en berdad e decadanan aki den un forma husto y bentahoso pa full sociedad.

Kico ta Inteligencia Artificial?

Den su forma mas basico Inteligencia Artificial (AI) ta tur forma di “Inteligencia” cu ta funciona riba substratonan no-biologico. Awo kico ciencia ta considera como Inteligencia ta un topico hopi complica cu lo dedica full un articulo na dje.

Awo AI no ta un topico nobo, na añanan 1950, pensadornan grandi como Alan Turing y John von Neuman a indica cu den teoria cu lo ta posibel pa un computer tin “Inteligencia”.

Na añanan 1980, e prome “appetizers” cual ta algoritmo Neural Net a wordo traha door di entre otro Marvin Minsky.

Anno 2024, nos a yega e tempo di Large Neural Nets cu ta e base di tur e programanan manera e conocido ChatGPT.

ChatGPT impresionante cu e, ta un capitulo chikito di loke lo ta posibel den futuro binidero.

Dicon e Revolucion aki ta asina special?

E journey di e humano moderno ta uno remarcabel. Door di nos inteligencia y cooperacion nos a crea un calidad di bida sumamente halto compara cu apenas 200 aña pasa.

Pensa di Medicina moderno, nivel basico como cas, cuminda, comunicacion via internet, celular, television y hopi mas.

Bukinan manera “Abundancia” di Peter Diamandis, “The Infinite Resource” di Ramez Naam ta papia di e topiconan aki den detaya.

Sigur tin hopi hopi cos fout ainda y cu por bay miho, manera guera mundial, pobresa internacional y local. Y sufrimento humano y di bestia en general.

Pero si nos wak e “Big Picture”, Humanidad a progresa enormemente. Esaki debi na e factor cu ta “Inteligencia” den e caso aki humano.

E promesa di AI ta cu por acelera e progreso aki den manera cu simplemente no lo ta posibel pa hende.

Ehempelnan ta e Cura pa Cancer, Panel Solar na prijs di Papel, Agricultura di un nivel y calidad halto, Resolve Global Warming etc etc.

E Trono Humano

E aspecto cu ta haci e topico aki uno hopi espantoso y tambe profundamente filosofico ta cu pa prome biaha den historia e status cardinal di e ser humano na e top di e piramid lo bin den duda. Op den duur un ser humano no lo por competi cu AI.

Na un nivel mas academico, na aña 2005 caba, ingeniero Raymond Kurzweil den su buki “The Singularity is Near” a toca e aspecto aki di AI.

Peliculanan dystopico manera Terminator y The Matrix ta ilustra e peligro di un super-AI cu lo wipe out humanidad. Pero tur e scenarionan aki ta den contexto di scarsedad y cu un AI hopi mal traha y sin ningun safeguards. Na Oxford Institute, academiconan ta pensando con lo por deal cu aspectonan asina.

Un pregunta menos filosofico y mas relevante ta. Con e ser humano lo deal cu e hecho cu no tin nodo mas pa traha den ningun manera. Den nos cultura ultra-Occidental unda e balor di un ser humano ta igual cu su trabou y e status cu e trabou aki ta brind’e den sociedad.

Awo si tur tur forma di trabou wordo automatisa incluso trabou fisico pero tambe esnan di mas intelectual manera dokter, abogado of te hasta profesor. E ora e ser humano mester haya un zingeving nobo.

Potencial di Utopia of Dystopia.

Awo cu algo asina cardinal y fundamental como nos posicion di “Rey Mundial” den duda. Nos por facilmente conclui cu AI ta un tema unda sociedad mester pensa hopi profundo mes over.

Na un banda e por crea un Dystopia, unda un clase super elite por wordo crea. Visualisa den e pelicula “Elysium”. Unda super biyonarionan ta biba den espacio. Wel e resto di humanidad ta biba den pobresa profundo.

E riesgonan strategico aki tambe a wordo discuti den e delaster buki di defunto Henry Kissinger “The Age of AI”.

Pero mas sigur nos por crea un futuro inmensamente bunita unda full sociedad por biba riba Entrada Universal den combinacion cu Tecnologianan cu avansa, sin nodo di mester traha pa entrada pa por biba. Un ehempel visual di esaki ta e serie “Star Trek”. Den formanan mas serio bukinan di Jeremy Rifkin “Zero Marginal Cost Society” of “Radical Abundancia” di Eric Drexler ta papia mas amplio di e sociedadnan sin scarsedad material.

Ki rumbo Humanidad kies pa tuma lo ta un debate andando riba e nivelnan mas halto politicamente. Pero cu cambionan sumamente grandi ta na caminda pa sociedad y nos chikito isla Aruba. Esey ta 100% sigur.

P’esey nos lo dedica nos mes na informa full pueblo di Aruba, incluso nos lidernan pa asina nos tur cuminsa pensa den forma adecua y structura over e tema aki.

Articulonan binidero:

Kico ta Inteligencia?

E Poder di Open-Source.

DeepSeek Coder: Imagina Acceso Gratis na un team di Google.

Automatisa Abogacia: Un Area cla pa Disruption.

Consultancy: Calidad di Big7 sin e Prijs.

Economia & Estadistica: IoT, Big Data y Nowcasting.

Democracia den Siglo 21: Blockchain y Analytics.

Science riba Autopilot.

Sistemanan di AI binidero.

Zero-Marginal Society.

The Long Tail: E Marktplaats Infinito.

Entrada Universal.

Un Mundo sin scarsedad Material.