(EFE) – Diasabra ultimo ciudadanonan Cubano a grita “Libertad” mientras cu iskierda Panameño a expresa su solidaridad cu e “revolucion” Cubano, durante manifestacionnan cerca di Embahada di Cuba na Ciudad di Panama cu a tuma luga sin incidentenan.
E gruponan a aglomera na avenida Cuba: e iskierdistanan, miembronan di sindicatonan y studiantenan universitario, nan a ubica dilanti di e sede diplomatico, mientras cu na 200 meter e Cubanonan a agrupa, tur di nan vigila pa un grupo di polis cu ademas tabata sirbi como barera entre ambos.
“Nos ta exigi libertad, nos ta exigi democracia, libertad di expresion, pa no tin mas maltrato ni genocidio, pa nan respeta nos derechonan, Cuba ta di e pueblo, como e pueblo ta Panama y esey ta loke nos ta pidi rumannan”, e Cubano Emmnuel Reyes a declara.
Reyes a conta cu e ta biba for di tres aña pasa na Panama, na unda el a yega despues di atravesa e peligroso selva di Darien, e ruta migratorio di miles di persona cu ta purba di yega principalmente pa Merca.
El a expresa si gradicimento na Panama pa acogel’e, el a bisa cu e Cubanonan ta sinti “empatia” cu e pueblo di e pais aki pa motibo cu nan tambe a “a sufri di un dictadura”, entre 1968 y 1989, y el a pidi pa keda alerta cu studiantenan Panameño cu ta bay na e isla pa sigui nan estudionan superior pasobra eynan nan ta “adoctrina”.
Riba esunnan cu a duna expresionnan di apoyo na e “revolucion” Cubano di parti di sectornan di iskierda Panameño, Reyes a sigura cu “nan ta respet’e pasobra nos ta hende di democracia”.
“Esunnan cu ta dilanti di Embahada di Cuba nan no ta Cubano, nan no sa ni sikiera loke nan ta bisa. Nos ta respeta nan protesta, pero esun di nos ta cu e berdad, akinan no tin gañamento y esey a keda demostra na henter mundo”, el a agrega.
Di su parti, Jorge Guzman, coordinado nacional di Frente Nacional pa defensa di derechonan economico y social di Panama (Frenadeso), el a bisa cu nan a reuni henter e siman dilanti di Embahada “den solidaridad” cu e pueblo Cubano y nan revolucion.
