Tension politico di Venezuela tin dos frente. E prome ta protesta riba caya, caminda hopi manifestacion opositor ta exigi eleccion y di otro banda grupo di oficialista ta defende presidente Nicolas Maduro. Diaranson tur dos grupo a subi caya y a enfrenta otro, lagando dos persona morto na banda opositor. E otro frente ta esun diplomatico, cu Organisacion di Estado Americano (OEA) como nan escenario.
Diaranson, Merca y Venezuela a protagonisa un cruce di posicion den sesion ordinario di conseho permanente di OEA, cu ta agrupa tur pais di hemisferio y caminda nan secretario general, Luis Almagro ta como un di e criticonan mas fuerte di regimen di Nicolas Maduro.
Merca a rechasa acusacion di colabora cu un golpi di estado na Venezuela, ora cu a denuncia e acusacion ey como un acusacion “infunda y sin rason” di banda di gobierno di Venezuela. Den sesion di conseho permanente di OEA, vice-canciyer di Venezuela Samuel Moncada a acusa Washington di planifica un golpi di estado contra Venezuela, cu desaroyo di protesta contra gobierno y cu iniciativa diplomatico pa asina isola Venezuela.
Pero representante di Merca, Kevin Sullivan a bisa cu e acusacion di un golpi di estado pa Venezuela, y e acusacion di un supuesto apoyo na manifestacion violento ta “infunda y sin rason”. “Ningun hende por ta mas leu di e realidad”, Sullivan a bisa.
Nicolas Maduro a declara diaranson mainta cu Merca a duna luz berde pa un golpi di estado, despues cu Washington a lansa un comunicado, caminda tabata adverti contra e represion violento y ilegal durante tur protesta di oposicion na varios ciudad di Venezuela. Departamento di estado di Merca a lansa un advertencia pa autoridad y funcionario hudicial na Venezuela, pa permiti e manifestacionnan di oposicion o, caso contrario, nan mester prepara pa tur e consecuencianan paden y pafo di Venezuela.
Di otra banda Moncada a bisa cu Merca ta dirigi y financia un golpi cu cierto factornan na Venezuela y den OEA. “Gobierno di Merca ta responsabel di dirigi e golpi awor na Venezuela”.
