ORANJESTAD – Minister di finansa y asunto economico, Xiomara Ruiz-Maduro a trece dilanti cu e practica di Arubaanse Vrijgestelde Vennootschap (AVV) tin cu stop na Aruba. Esaki debi na reglanan stipula dor di Organisacion pa Cooperacion y Desaroyo Economico (OECD). “E asunto di AVV ta algo cu nos sa caba desde aña 2009, kico tur ta bay pasa. Pues e ora ey nan AVV lo stop di existi,” el a bisa.

E mandatario a haci e declaracion aki na Bon Dia Aruba, despues cu e companianan di trustkantoor a manda un carta, caminda nan a expresa nan preocupacion cu e ley cu tin di haber cu e compania transparente a pasa diahuebs ultimo, sin cu nan a haya chens di duna nan opinion.

Minister Ruiz-Maduro a splica cu e companianan di trustkantoor a bruha dos cos den otro. El a agrega cu e ley aki relaciona cu compania transparente of ‘transparante vennotschap cu ta permiti cu pais Aruba lo sali for di e lista preto di Union Europeo, no tin di haber cu AVV.

E ley cu e compania transparente tin di haci cu e tres regimen fiscal, entre nan: regimen fiscal special di San Nicolas, e ‘patente box’ di IPC y esun di compania transparente. E dos prome a wordo atendi debidamente, pero e delaster no, debi cu gobierno tabata bezig y a duna prioridad pa atende cu e reforma fiscal.

AVV tin problema
E mandatario tabata cla pa bisa cu, for di aña 2009 caba a wordo indica cu AVV mundialmente tin problemanan cune. Instancianan di supervision internacional ta considera cu e negoshinan cu ta wordo haci via AVV no ta suficiente transparente den cierto cos. El a indica cu tin cierto cambio cu na medida di e tempo ya caba a wordo haci durante 10 aña, pero a pone tambe –segun e mandatario- cu te 2018 lo tene e AVV te ora e caba.

“Nan ta yam’e na Ingles cu e ta wordo ‘grandfathered’ te 2018,” el a bisa. Mirando cu 2018 a pasa y for di OECD of organisacion economico nan ta aplica e regla den cual e instancia aki ta indica cu e practica di AVV tin cu stop.

Pa atende cu e asunto di AVV a haci cambio den e buki 2 of buki nobo cu lo wordo introduci y cu lo rigi e parti comercial na Aruba. Hunto cune lo bin cambionan cu ta toca e trustkantoor aki. E trabou aki di buki 2 ta uno cu ta andando di basta aña y cu proximamente lo keda conclui.

Minister Ruiz-Maduro a bisa cu e cambionan aki lo bini na luna di mei proximo. Esaki –segun e mandatario- lo duna tempo suficiente pa por atende cu e preocupacionnan cu e compania di trust kantoor a canalisa den Parlamento. Durante e tratamento di e ley cu tin di haci cu e compania transparente, e mandatario a tuma su tempo pa splica nan cu e ley cu a keda aproba ta totalmente otro ley. Mientras esunnan cu tin di haber specificamente cu e trust kantoor otro luna lo yega Parlamento pa atende cu e asunto di AVV.

El a afirma cu e preocupacion cu e trust kantoor a expresa pa medio di nan carta lo wordo atendi debidamente. Mas cu claro nan ta bay haya na reunion.