One Healthy Day ta un festival di un dia, sin fin di lucro, concentra riba salud y bienestar di Aruba, famia y tur persona, unda nan lo por explora e opcionnan saludabel cu e isla tin pa ofrece riba e proximo 20 di maart.

Cu mundo completo confrontando tempo dificil cu salud, ‘selfcare’ a bira mas evidente cu nunca specialmente dentro di e comunidadnan di Caribe Hulandes. Esey ta exactamente loke kier activa cu e evento aki, unda kier uni y inspira hende pa nan ta mas consciente y proactivo tocante nan salud. One Healthy Day ta inclui tur hende y ta inspira riba ‘selfcare’ mas leu di cualkier limitacion fisico of mental.

Dia 20 di maart, Aruba lo conoce pa prome biaha e festival anual di salud ‘One Healthy Day’, un concepto desaroya pa un restaurant di cuminsa saludabel conoci y Levi Silvanie, unda diferente organisacion y fundacion rond di henter e isla lo uni pa simultaneamente haci mas di 60 actividad di salud, deporte y nutricion pa tur edad y nivel.

Ademas di uni y capacita hende cu e evento aki, e vision a largo plaso ta pa logra cu tur habitante di e isla hiba un bida mas sano y saludabel. Durante henter aña, One Healthy Day lo realisa varios actividad deriva den colaboracion cu IBiSA y DVG. Un di e obhetivonan principal ta pa crea un fondo pa apoya mucha di famia di menos recurso cu inscripcion p’e cursonan di deporte.

William Erasmus di IBiSA a indica cu apart di actividadnan fisico y nutricion, tambe algun di nan ta dirigi pa salud mental, unda diferente organisacion, restaurant y luga di train ta uni pa brinda e oportunidad gratis pa henter Aruba por train y haci diferente actividad dia 20 di maart.

For di 5or di mainta te cu 10or di anochi Cas di Cultura y otro luganan rond di e isla lo ofrece diferente les y informacion di loke ta trata cuminda saludabel, training, movecion, etc., unda comunidad por participa of haya informacion di e 67 actividad cu diferente profesionalnan specialisa como por ehemplo den Kayak, Yoga, Fitness Instructor, entre otro, cu lo ofrece e dia aki.

Ademas el a señala cu esaki ta un idea cu tin hopi tempo caba y aworaki den aña 2022 lo tuma luga cu e intencion cu nan lo sigui organisa mas actividad chikito di e tipo aki durante henter aña, pa asina promove salud mental, movecion y nutricion di personanan.

Ademas, e dia aki tambe lo tuma luga e edicion number 36 di Aruba Internacional Half Marathon y un otro actividad na California Light House dirigi pa muchanan di scol; pero adultonan tambe por participa manera Erasmus a indica. El splica cu pronto nan lo duna mas informacion tocante e esaki.

Sarah-Quita Offringa, embahador di e evento aki, tambe tabata presente den conferencia di prensa, unda el a menciona: “Mi ta kere cu e ta un iniciativa hopi great, cu hopi chens increibel pa hopi hende cu no tin e chens pa haci cierto deporte, nan lo por haci e dia ey. Ami mes ta haya cu deporte ta hopi importante principalmente aki na Aruba”, el a expresa.

Di mesun manera, el a bisa cu ora tin mas actividad deportivo hende ta cuminsa bira mas activo. Y e ta kere cu “un dia di One Healthy Day lo yuda cu esey tambe”. El a indica cu riba e dia aki, e no ta bay duna les di Windsurf, e deporte cu e ta practica, pero e lo t’ey na Cas di Cultura pa asina conta di su experiencia di biahamento y kico e deporte a haci den su bida.

Lo tin diferente orario di e actividad y cu cantidad di hende limita segun Erasmus a expresa unda cu si personanan ta interesa di participa y inscribi den actividadnan di e dia aki por haya mas informacion riba e website: www.onehealthyyouaruba.com.