(EFE) – Amazonia Brasileño a registra 2.308 candela na juni, e mayor number cu a wordo registra pa e luna ey for di 2007, segun Instituto Nacional di Investigacion Espacial (INPE) a informa.
Candelanan registra na juni a aumenta na 2.6% pa loke ta trata e mesun periodo di aña 2020, ora Amazonia a alcansa un record di candela.
E datonan a wordo publica e mesun siman cu e Gobierno di presidente Jair Bolsonaro a mustra un decreto den cual a suspende pa 120 dia e uso di candela na e region, debi na comienso di epoca di secura, y a determina e envio di Forsa Arma pa combati e deforestacion y candelanan, e medida ultimo a wordo cuestiona pa organisacionnan medio ambiental.
“Lamentablemente, e record ey di luna di juni no ta un sorpresa, considerando e continuacion di e politica medio ambiental y insistencia di utilisacion di un herment costoso como e envio di tropa militar, cu a mustra no eficaz den ultimo dos aña”, Greenpeace den un comunicado a denuncia.
Ecologistanan a adverti cu e candelanan lo por bira pio mas ainda den lunanan siguiente, specialmente na augustus y september, cu e intensificacion di e epoca di secura den e region.
E candelanan na selva tropical Brasileño a surpasa e record historico bao e mandato di e presidente Jair Bolsonaro, cu su politica medio ambiental a wordo critica hopi fuerte pa organisacionnan ecologico y tambe pa paisnan stranhero.
Un Amazonia deteriora ta aumenta e presion riba Gobierno y a pusha un importante grupo di fondonan di inversionnan global pa adverti riba un retiro eventual di capital, den caso cu no lo wordo reforsa e combatimento di deforestacion.
E politica di Ehecutivo di Bolsonaro a pone den wega e avance di e acuerdo comercial entre Union Europeo (UE) y Mercosur (Brasil,Argentina, Uruguay y Paraguay) despues cu Francia a expresa su rechaso na e tratado di expone problemanan ambiental.
