E preparacion y elaboracion riba reforma fiscal keto bay ta andando, asina Bon Dia Aruba a yega di compronde for di minister di Finansa, Angel Bermudez.
E mandatario a indica na e matutino aki cu elaboracion di un reforma fiscal ta un tarea hopi grandi. Esaki ya cu mayoria di nos leynan fiscal ta hopi anticua, practicamente nan ta data di inicio di siglo pasa for di 1908 te hasta den temporada di II Guera Mundial den decada di aña 1940.
“Cada bes un pida nos ta coy pa nos modernis’e y simplific’e y asina ey hacie mas miho aplicabel.”
Ley di Aduana
Na e momentonan aki locual nan tin den tapara den e departamento di Legislacion y Huridico (Directie Wetgeving en Juridische Zaken) ta un concepto di ley totalmente nobo pa Aduana.
Duana ta e di dos departamento generado di entrada pa caha di gobierno. E ley cu actualmente ta regarda operacion di duana ta uno basta bieu tambe. E concepto di ley nobo lo reemplasa esaki; y e mandatario ta kere cu esaki lo sosode na cuminsamento di aña 2017. E ley aki ta wordo yama Alday e ta un ley basta grandi y un materia complica, pero e ta den su fase final.
E concepto di ley aki ta canando su procedura normal y eventualmente pa januari awor e ta bay Parlamento, caminda nan lo trata tur su contenido, stipulacionnan, regulacionnan y reglanan. E instrumento legal ta trece un modernisacion y organisacion na departamento pa duana por realisa nan trabou.
Di otro banda –segun minister Bermudez- e simplificacion di e ley aki lo yuda pa e clientenan tambe por compronde hopi mas miho e reglanan cu duana ta aplica.
