ORANJESTAD— Fuentenan cu Human Rights Caribbean Foundation (HRC) a trece na atencion di Bon Dia Aruba ta indica cu autoridad controlando ilegalidad, esta Guarda Nos Costa, ta detene personanan inhustamente mientras nan ta wardando un procedura pa legalisa, hopi biaha den e ambito di asilo politico.
Esaki ta siguiendo un siman unda e departamento di Guarda Nos Costa a ricibi critica fuerte por medio di un remitido cu a sali riba matutino Diario unda ta papia di autoridadnan cu ta anda arogantemente cu personanan cu hasta tin biaha tin firma liber, pero no ta duna e oportunidad di presenta nan documento. Ora nos periodista a trece esaki na atencion di Minister di Husticia Andin Bikker (POR) el a expresa cu su ministerio tin oido pa e casonan aki, pues cualkier señal cu drenta, nan ta purba corigi.
Sinembargo e Minister a admiti si cu den e departamentonan manera Guarda Nos Costa tin falta di hopi training pa empleado publico por eherce nan funcion corectamente respetando derechonan personal di personanan cu nan lo kier detene.
Detencion di persona sperando procedura
Den ultimo simannan, Bon Dia a ricibi indicacion di varios fuente cu a deporta un grupo di mas cu 20 Venezolano, cual no ta sigur si nan tabata wardando contesta riba nan procedura, sea di asilo of procedura regular pa permiso. Ademas tin indicacionnan fuerte cu lo tin personanan cu actualmente ta encarcela na Sabana Berde cu ainda ta wardando nan peticion, pero pa via cu frontera ta cera, no tin un dia ultimo pa deporta nan.
Algun persona cu a acerca nos reportero ta haya esaki inhusto, bisando cu si e persona mester bay, e mester bay, pero no ta compronde dicon mester detene un persona indefinidamente pasobra no ta conoci te ki dia ta habri frontera bek. Esaki ta contrario na loke tabata e maneho aña pasa ora frontera a cera, unda a institui un tipo di obligacion pa meld regularmente na autoridadnan migratorio, mientras no ta sigur con e situacion cu e frontera ta pa asina por deporta Venezolano specificamente.
Siman pasa, durante conferencia di prensa, Minister di Husticia a declara cu deportacionnan ta sigui. Sinembargo, no ta conoci con esaki lo por, mirando cu fronteranan ta cera. E informacion cu Bon Dia tin disponibel ta bisa cu ultimo avion cu a trece Arubiano y otro personanan permaneciendo legalmente na nos isla cu a keda pega na Venezuela, ta e mesun avion cu a bay bek Venezuela pa hiba esnan cu mester a deporta, pues e mas cu 20 persona cu a saca ultimo.
Asilo politico
Den ambito di peticionnan pa asilo, Bon Dia Aruba a bin compronde cu a detene varios persona cu tabata wardando contesta riba nan peticion di asilo, un echo cu ta fuertemente contra tratadonan internacional, specificamente e protocol pa e status di refugiado cual Aruba ta participa aden. Cu e posibilidad fuerte aki den man, nos reportero a acerca autoridad migratorio Guarda Nos Costa pa un comentario. E fuente den e departamento a pidi pa no graba, pero si a bisa cu ta berdad cu tin persona cu nan (como autoridad) ta gara cu tin peticion di asilo wardando. Nos reportero a puntra dicon ta gara e personanan aki mirando cu tin un procedura andando, pa cual e fuente a indica cu ta pa via cu autoridad migratorio ta gara nan trahando, mientras nan no mag di haci esey.
Sinembargo nos a trece dilanti cu personanan cu tin permiso di asilo provisional, esta sperando un decision final, no tin ningun restriccion pa loke ta busca un trabou. Riba esaki e fuente a reacciona bisando cu nan ta gara personanan cu tin un peticion di asilo wardando pero cu te ainda no a ricibi e permiso aki, esta segun e fuente ‘prome cu a evalua y ya caba establece cu probablemente lo otorga nan peticion’.
Esaki no ta informacion cu nos por confirma te awo mirando cu den un caso cu nos a yega di trece dilanti den pasado, esta di Jose Pimentel y su famia, kende a bandona nos isla pa via cu nan ta haya cu Aruba no ta respeta derecho humano, e persona a ricibi su permiso provisional desde 2016 ora a entrega un peticion y a consecuentemente renoba esaki 2 biaha prome cu Dimas a dicidi di nenga nan peticion.
Di otro banda, un persona cu ta wardando contesta riba nan peticion di asilo a bin dilanti bisando cu aña pasa Guarda Nos Costa a detene mientras su permiso di estadia pa warda su peticion di asilo tabata vigente. E persona a bisa cu nan a detene 11’or di mainta y a lag’e bay 5’or y mei ora Guarda Nos Costa a bin compronde cu e persona tabatin un documento valido. E persona a prefera di keda anonimo.
Nos lo ta buscando aclareacion di parti di Minister di Husticia su consehero huridico pa asina haya sa con esaki ta hinca den otro y si loke GNC a haci ta cuadra cu con e procedura mester bay of no. Ademas di tin un falta di espacio pa sigui detene persona, tin fuente cu ta bisa cu GNC no ta laga personanan cu a para garante pa un detenido bishita nan si nan tin mas cu 2 siman den cel y tampoco trece cuminda pa nan. Segun nos fuente paden di e departamento, nan ta ricibi cuminda amplio, pero e persona anonimo a conta cu riba cierto dianan nan ‘ta haya un pan so’.
