Na Corsou reforma integral di enseñansa y formacion ta un proceso dinamico y mester ta un proceso  continuo y duradero

Den e cuadro aki Gobierno ta para pa un reforma educacional cu tin un impacto riba tur nivel simultaneamente. A constata cu e actual sistema y curiculo di nos enseñansa no ta tene cuenta suficientemente cu nos situacion local y desaroyonan internacional. Ademas tin diferente problema agudo den nos enseñansa cu mester atende den forma rapido y coherente.

E enfoke lo ta entre otro riba e siguiente aspectonan:

Inventarisacion di e situacion actual riba tur aspecto di maneho (nulmeeting);

Evaluacion, revision y adaptacion di e curiculo di nos enseñansa primario y secundario, incluyendo e formacion di hobennan den cuadro di segundo oportunidad;

Evalua re- introduccion di enseñansa tecnico segun criterionan di 2021 haciendo uzo di stipulacionnan den legislacion existente; Evalua e grupo cu mester participa na educacion pre- escolar, pa mira unda nos muchanan entre 0 – 4 aña ta, y realisa cambionan pa drecha calidad pa e categoria di edad aki;  Inversion den instituto cu ta forma maestro, pa asina fortifica calidad di tanto e maestro nobo como esun cu ta den servicio;

Den cuadro di esaki mester pone atencion en particular riba habilidad nan pedagogico mas moderno. Atencion special mester ta dirigi riba halsa nivel di digitalisacion;

Recapacitacion y profesionalisacion continuo di maestro y docentenan;

Inversion den condicionnan y medionan basico pa e maestro por duna les optimalmente;

Introduccion di “scol amplio” riba nivel di enseñansa di Fundeshi y eventualmente enseñansa avansa particularmente den barionan caminda e necesidadnan ta mas agudo;

Optimalisa “buro na scholing.

Reevaluacion di e ley di enseñansa di fundeshi pa loke ta trata e concepto di keda sinta;

Intensifica sistemanan pa keda monitoria calidad di enseñansa;

Atende acreditashon di diplomanan cu ciudadanonan ta obtene na Corsou y den exterior y cu no ta reconoce actualmente aki na Corsou;

Den cooperacion cu Ministerio di GMN y Naskho fortifica e posesion regional di Corsou riba tereno di enseñansa medico transnacional

Stimula  conscientisacion pa cu e dia Internacional di Enseñansa y Educacion cu wordo institui mundialmente dor di UNESCO (United Nations Educational, Scientific and Cultural Organization) pa conmemora importancia di enseñansa y educacion den desaroyo di mundo en general y Corsou en particular.

Mantencion di edificionan di scol cu e meta pa halsa e nivel di e ambiente pedagogico didactico y haci scolnan mas atractivo pa e alumno;

Digitalisa enseñansa mas tanto posibel como medio di educacion. ICT mester sostene enseñansa den su totalidad;

Introduccion di formacion pa adulto den barionan den cuadro di “Life Long Learning”, teniendo cuenta specialmente cu e proceso di digitalisacion;

Reforsa e guia, inspeccion y control riba diferente area di nos cadena di formacion y educacion, incluyendo en particular e Departamento di Inspeccion di Enseñansa, teniendo cuenta cu e.o. e lei di Enseñansa Obligatorio;

Baha e indice di ‘dropout’;

Realisa e conexion pa sigui estudionan den exterior, tanto regional como na Europa y continua cu stimulacion di estudionan superior den region. Sigui garantisa oportunidad pa nos hobennan por sigui estudionan avansa tanto local como den exterior;

Inventarisa alabes un formula pa garantisa regreso di nos profesionalnan hoben ora nan termina nan estudio. Den e cuadro aki diseña un formula pa limita e debe di estudio y facilidadnan aceptabel di pago bek;

Evalua y reforsa e maneho di financiamento y cobransa di estudio y tambe e organisacion cu ta ehecuta esey;

Crea oportunidad pa nos hobennan por core stage na diferente nivel den gobierno, y incentiva empresanan particular pa nan tambe duna nos hobennan e oportunidad pa un stage den nan kompania;

Revisa normanan pa scolnan subsidia dor di gobierno y analisa con di un forma “smart” por reduci gasto. Transformacion di Biblioteca Nacional den un centro di informacion moderno.