(EFE) – Agencia cu ta regula uso di medicamento na Colombia diabierna ultimo a autorisa e uso di molnupiravir, un pildo pa trata coronavirus, desaroya pa e compania farmaceutica Merck Sharp & Dohme.
Instituto Nacional di Vigilancia di Medicamento y Alimento (Invima) den un comunicado a señala cu a aproba “solicitud di Autorisacion Sanitario di Uso di Emergencia (Asue) di e medicamento molnupiravir" pa atende "pashentnan cu malesa leve pa moderado di covid-19”.
E Sala Specialisa, asesor di expertonan di Invima a splica cu e autorisacion a tuma luga despues di evalua e “data cientifico, haya den un balans di riesgo-beneficio aceptabel na momentonan aki di pandemia, pa loke ta aproba cu algun caracteristicanan special pa su indicacion. E medicamento lo wordo administra unicamente bao formula medico na hende grandi cu malesanan di leve pa modera cu no a ser vacuna. Ademas, e contagio por wordo confirma a traves di un test di PCR of di antigeno.
Igualmente, e personanan aki no por a presenta e malesa aki anteriormente y mester tin por lo menos un factor di riesgo pa desaroya Covid-19 grave, como por ehemplo, obesidad, tin mas cu 60 aña, malesa cronico, cancer activo, entre otro.
Invita tambe a autorisa e vacuna Zifivax contra coronavirus di e farmaceutica Chines Chongqing Zhifei Biological Products, cu no ta aproba ni pa Organisacion Mundial di Salud (OMS) ni pa Agencia Europeo di Medicamento (EMA).
Segun Invima, estudionan clinico cu ta den fase 3 y ta inclui 28.500 boluntario, a confirma cu e vacuna tin un eficacia di 81.76% prome cu e dos siman di aplicacion di su di tres dosis.
Otro resultadonan a indica cu no tabatin problemanan mayor den relacion cu efectonan secundario pa loke ta trata e grupo cu a ricibi e vacuna, segun Invima a señala. Skema completo di e vacuna aki lo ta di tres dosis, despues di e prome mester warda un luna pa haya e dosis dos. Esaki solamente ta autorisa pa uso den personanan mayor di 18 aña.
