Eleccion Primaria di oposicion di Venezuela ta tuma luga dia 22 di october na 31 pais rond mundo. Na Aruba tin un comite local encarga cu e parti di votacion pa ciudadanonan Venezolano residencia na Aruba y e comite local aki a organisa un caminata ayera diadomingo en conexion cu e eleccion aki. Laura Luces, un di e coordinadornan di e comite, a conta Bon Dia Aruba tocante e meta di e caminata aki, con eleccion primaria lo ta hinca den otro na Aruba y e crisis di Venezuela.

Luces a indica cu e meta principal di e caminata tabata e visibilidad di e eleccion primaria, pa hende tuma nota di esaki y pa recauda fondo pa tanto e eleccion na Venezuela como na Aruba.

El a splica cu e eleccion primaria ta auto financia, esey keirmen cu e regimen a bisa cu nan no ta bay colabora cu nada. Pa e motibo aki, pa yuda cu e gastonan di e eleccion, a haci un caminata pa recauda fondo tambe.

E comite a haci incsripcion pa e caminata cual tabatin un costo di 10 florin. Di e 10 florin aki, Luces a indica, nuebe florin ta bay pa Venezuela y e comite local ta keda cu 1 florin, mas e benta di e t-shirtnan cu nan a traha.

Luces a remarca cu nan tabata spera basta hende participa den e cminata, pero pa motibo di e calor pisa, alrededor di 37 grado celcius,lamentablemente hopi hende a cancela.

E coordinadora a splica cu pa e comunidad Venezolano na Aruba cu kier vota den e eleccion primaria por haci esaki na Centro di Bario Playa Pabou dia 22 di october. El a indica cu tin aproximadamente 1500 ciudadno Venezolano cu ta inscribi pa vota den e eleccion. “Nos ta spera cu realmente e ta un exito e dia ey pa pone nos granito di santo pasobra na final esey loke nos por haci,” Luces a remarca.

Pa eleccion primaria, aunke un persona no tabata inscribi den e registro electoral di CNE, e por vota den e eleccion, pero e persona mester ta inscribi den e primaria. Esnan cu no a inscribi den e primaria no por vota, cu excepcion cu si e persona ya a yega di vota na Aruba caba y ta inscribi caba.

El a recorda cu pa esnan cu ta bay vota, nan mester di nan cedula di identidad Venezolano lamina of nan paspoort. El a subraya cu importante di e paspoort ta cu e mester bisa e number di ID, no ta importa si e ta vigente of no, e por ta un paspoort of ID bieu cu ta venci y igual lo sirbi.

Ariba e tema di lucha cu e pueblo Venezolano tin pa hopi aña y e decepcion cu hopi Venezolano tin den e oposicion den ultimo tempo, Luces a enfatisa cu Venezuela tin 24 aña cu un oposicion cu realmente a decepciona e pueblo Venezolano y e lidernan cu tabata representa e oposicion no tabata riba nivel.

El a recorda cu e prome eleccionan cu tabatin na Aruba tabata contra Manuel Rosales, tempo cu tabata e prosperidad di e difunto presidente Hugo Chavez, ora cu e tabata “todopoderoso na Venezuela” mas di 20 aña atras. Difunto Chavez tabatin un forsa enorme y totalmente di otro mundo y na Aruba Chavez a gana e aña ey 80 contra 20.

El a splica cu mientras mas aña a pasa, y ya caba 24 aña a pasa di e crisis cu e pais ta biba, evidentemente hende a cansa y kier otro cos. El a sigui splica cu despues di e eleccion di Rosales, semper e regimen tabata haya menos voto cada eleccion te cu na e ultimo eleccionnan cu a tuma luga, e supuesto eleccionnan cu Maduro a gana, pa prome biaha oposicion a gana na Aruba, cu tabata representa pa Capriles.

Luces a remarca cu Capriles no a gana pa dos voto of 10, el a gana pa un ola grandi y esey tabata e momento pa oposicion tin forsa, pero e candidato a retira. Esaki, el a resalta, tin hopi di haber cu e hecho cu e dictadura di Maduor ta un dictadura criminal, unda e lidernan di e gobierno di Venezuela ta wordo busca y tin recompensa pa nan cabez.

“Nan ta criminalnan y nan a arma un cantidad di hende, cu ta loke nan tin awendia. Manera nan tabata yama nos anteriormente, ‘escualidos, aworaki nan ta ‘escualidos’,” el a resalta.

E coordinadora a agrega cu na e momentonan aki Venezuela ta mas caro cu Aruba, pero e diferencia ta cu na Venezuela nan no ta cobra ni cinco dollar pa luna.

E migracion Venezolano a ser cataloga como un di esunnan mas grandi di ultimo temponan, pero no ta exporta e mesun calidad di hende cu anteriormente. For di Luces su punto di bista aworaki Venezuela ta exportando miseria pasobra e prome migrantenan tabata e personanan cu den su mayoria tur tabata profesionalnan.

El a remarca cu ainda tin hende hopi valioso na Venezuela, pero hopi profesional, hopi capacita, ta e prome nan cu a sali y e tabata un bon migracion. Aworaki, el a subraya, lamentablemente loke ta saliendo ta hende cu ta mas humilde y cu ta malcustuma cu e regimen pasobra nan tabata ricibi nan cahita gratis di cuminda y aworaki e cahita gratis ta bin putri.

Asina no ta keda e ciudadonan nada otro cu bandona e pais y esey ta esnan cu ta bay canando, pasando e selva Darien, ta esnan cu ta yega Aruba via boto y cu no ta worry si nan hoga, pasobra na Venezuela nan ta biba asina malo.

Luces a resalta cu en berdad awe ta Venezuela ta pasando den e crisis horible aki, pero e ta señala cu Latino America ta mas o menos den e mesun caminda.

“Si for di cuminsamento mundo lo a yuda nos manera cu nan mester a yuda nos, no lo tabatin mas di shete miyon di Venezolano afo di Venezuela, y mas cu kier sali, y no lo tabatin e cantidad aki di comunista na Latino America,” el a enfatisa.

Por ultimo, pa loke ta e tema di inhabilitacion di algun candidato di e eleccion primaria, el a indica cu tin hopi desanimo pa loke ta e tema e tema aki pasobra candidata cu tin mas opcion di gana, ta hustamente un perosna cu ta inhabilita.

El a agrega cu probablemte si tabata cualkier otro candidato cu tin 80% di voto toch e regimen lo inhabilita e candidato pasobra loke e regimen di Maduro kier ta pone un candidato opositor cu nan kier.

El a splica cu den caso cu un candidato inhabilita gana e eleccion primaria, e unico cos cu por haci ta cu oposicion uni cune y como un forsa unico exigi pa e candidato inhabilita bira e candidato presidencial di oposicion.