E aña aki un biaha mas a organisa e campamento pa mucha cu ta yiu of nieto di empleadonan, conoci como e “Hospi Bondi Camp”. Manera vakantie cuminsa muchanan ta puntra ki dia tin Hospi Bondi Camp y e muchanan tabata hopi entusiasma cu atrobe a logra bin cu e camp ya stima y anhela cu ta dura dos siman largo.
E team organisado a haya nan mes hopi druk cu e preparacion p’e Hospi Bondi Camp cu manera semper a resulta di ta un exito.
Por a mira hopi mucha contento, cla pa hunga, trip y haci hopi Aventura. Rachelle Roos, hoofdleidster y coordinador di Hospi Bondi Camp, a duna di conoce cu a tene diferente actividad cu e muchanan, entre otro bay lama, cana den naturalesa, diferente sport, bowling, cinema, presentacionnan y hopi mas. Hasta e aña aki tabata un tiki diferente door cu despues di hopi tempo tambe a bay Baby Beach y tabatin sportdag bou direccion di Super Thought School di Danny Tromp. E aña aki a organisa e di 29 edicion di Hospi Bondi Camp y otro aña lo celebra grandemente 30 aña di existencia.
Hospi Bondi camp a culmina cu un clausura mescos tur aña unda cu e muchanan a haci show p’e mayornan por a disfruta di esaki. Sra. Roos a duna di conoce cu e camp a bay hopi bon. Tur dia tabatin actividad y e muchanan a gosa y disfruta asina hopi cu tabatin algun bou yoramento pasobra no kier bay cas.
Aña 2022 ta na caminda y ta 30 aña di Hospi Bondi Camp. Nan ta “looking forward” pa celebra e 30 aña di existencia di e dushi camp di Hospi Bondi. Sra. Roos a gradici Hunta di Directiva p’e confiansa, sra. Sheila Kelly di recurso humano di Hospital, su hefe di departamento pa e aporte y na e ex-team di Hospi Bondi: Noralfa, Aldrich y e team completo cu no tabata t’ey e aña aki. Na su man drechi cu ta Josephine un danki enorme y claro na tur mayor y lider cu tabata t’ey y a dun’e confiansa pa por a organisa Hospi Bondi Camp.
