Ayera nochi durante conferencia di prensa di gobierno, prome minister Evelyn Wever-Croes a duna informacion tocante intencion di habri frontera bek. Entre otro, el a comenta cu awe aeropuerto lo tene un ‘test run’.
E test run ta un forma pa aeropuerto check con cos ta cana, pa sigura cu tur cos ta bon prepara pa momento cu habri frontera.
Ademas, Wever-Croes a declara cu a ricibi conseho di outbreak management team di RIVM tocante reapertura di frontera. Ya caba Aruba ta cumpli cu ‘mayoria’ di e rekisitonan pa por habri frontera, y esunnan cu falta, gobierno ta preparando pa asina por cumpli cu tur. Esaki pasobra ta purbando di minimalisa e riesgo na momento di habri frontera bek. Wever-Croes a splica cu elimina riesgo no ta algo cu ta den lenguahe di covid-19, pero cu ta haci tur lo posibel pa minimisa esaki.
Tambe Wever-Croes a referi na reapertura di scol. En principio dia 8 di juni tur scol mag di habri 100%; pero algun scol lo warda te e siguiente siman pa asina sigura cu ta cumpli cu tur protocol. Wever-Croes a enfatisa cu si un mucha ta malo, e no mag di bay scol sino mester keda cas – specialmente si ta grip, tosamento, problema pa hala rosea – y lo por haci un test di covid-19. El a reitera cu mester cooperacion y sacrificio di tur persona pa asina minimisa riesgo pa henter comunidad.
