(EFE) – Por lo menos 56.098 hende muhe a wordo viola na Brazil na 2021, un aumento di 3.7% compara cu 2020, loke ta supone cu cada 10 minuut un muhe tabata victima di abuso sexual na e pais e aña pasa, segun un estudio publica dialuna ultimo.
Aunke feminicidio a disminui un 2.4% na 2021, ta mantene un cifra similar cu esun registra na 2020, ora 1.351 hende muhe a ser asesina na e pais Latino Americano pa e hecho di ta hende muhe, un di nan cada 7 ora.
Den total, e aña pasa 1.319 hende muhe tabata victima di morto violento, 32 menos cu na 2020, segun estudio realisa pa Forum Brasileño di Siguridad Publico cu a ser publica dialuna ultimo, den bispo di e conmemoracion di Dia Internacional di Hende Muhe.
Di acuerdo cu e analisis, entre 2019 y 2021 a registra un aumento di asesinatonan entre lunanan di februari y mei di 2020, ora na Brazil tabata tumando luga e aislamento total, debi na restriccionnan imponi pa detene e plamamento di Covid-19, un pandemia cu apenas tabata cuminsa na e pais.
No obstante, e number di feminicidio e aña pasa tabata hopi similar cu esun di 2020, cu un promedio di 110 victima pa luna.
E investigacion a enfoca riba e denuncianan registra na wardanan di Polis na e 27 estado di e pais, tambe a revela cu por lo menos 100.398 mucha muhe y hende muhe a sufri di violencia sexual entre maart di 2020 y december di 2021.
Sao Paulo, estado cu mas poblacion di Brazil cu casi 46 miyon habitante y cu ta considera como un di e mas violento, tabata un di e regionnan di e pais cu a registra un baha den number di feminicidio, ora a pasa di 179 victima na 2020 pa 136 e aña pasa.
“ E datonan publica ta señala e urgencia di implementa politica publico pa recepcion, prevencion y enfrentamento di violencia contra mucha muhe y hende muhe na Brazil”, e director ehecutivo di FBSP Samira Bueno a splica.
