E problema cu a surgi cu e pida costa dilanti e proyecto hotelero Embassy Hilton na Eagle a mustra riba un manera straño di opera como gobierno. E asunto ta cu despues cu mas di 10 aña pasa caba e proyecto a laga gobierno di e tempo ey sa cu nan ta interesa di converti e pida costa cu ta baranca, den un beach pa e hotel. Na aña 2010, den un comision cu bao guia di e ministro encarga cu turismo di e tempo ey tabata atende e tema di e cantidad di proyecto di acomodacion turistico, a discuti e asunto aki y loke a keda treci dilanti tabata cu e idea tabata mustra bon, pero cu no tabatin tanto sentido pa cubri e area ey cu santo di lama, pasobra coriente di lama mes lo bay cu e material ey den poco tempo. Aparentemente den e tempo cu a transcuri a bin otro pensamento, pasobra awor, sin cu nos a mira un splicacion pa esey, y sin un MER-rapport, ta otorga permiso pa haci exactamente loke tanto aña pasa no tabata mira factible.

En todo caso, e tempo aya no a sigui delibera riba e caso ya cu e no tabata e topico principal, pero ta interesante pa señala cu e tempo ey e comision si a yega na un conseho na e mandatario di e tempo ey tocante un moratorio riba acomodacion turistico, preferiblemente den un ley. E ministro a mustra inmediatamente su oposicion contra tal idea y awor nos ta 13 aña mas leu, observando e ‘Torremolinos.2’ cu ta creando na Aruba, bao di e consigna, manera ta skirbi textualmente den e permiso otorga pa e actual ministro encarga cu Infrastructura y Planificacion, ken ta tambe nos Promer Ministro: “Dat het toerisme de grootste en belangrijkste pilaar is van onze economie en derhalve het toeristisch belang als algemeen beschouwd kan worden”.

Nos no ta bay trata en extenso e contenido y consecuencia di e pensamento aki; loke si nos ta bisa cu buena marcha di turismo ta di excepcional interes di nos pais…, pero, si no ta percura pa un turismo sostenible, a largo plazo e aprobacion di cualkier proyecto, den nomber di interes turistico cu a bira interes general supuestamente, ta keda converti exactamente den e menaza y peligro principal pa e propio turismo ey, y por lo tanto tambe pa nos futuro economico. Nos tin otro pensamento cu e promer mandatario den esaki, pasobra ta hustamente na e momentonan aki mester a ‘draw the line’, pero nos ta comprende tambe cu tabatin un proceso di varios aña caba andando unda e departamentonan concerni a yega di haci yen di ‘toezegging’, loke ta haci mas dificil pa para e proceso. Si esey ta e caso, ainda nos no ta mira pakico mester purba presenta e asunto lo mas positivo posible, simplemente bisa anto cu tabata imposible pa para e desaroyo no faborable aki… Pero no, e punto ta cu e opinion ta cu ‘cueste lo que cueste’ e proyecto mester sigui, loke ta enteramente otro posicion.

E otro banda di e asunto ta cu e ministro encarga cu Naturaleza y Medio Ambiente a asumi e papel cu e tin den e asunto, mirando e destruccion di vegetacion cu tabata tumando lugar, solamente di un manera eroneo. Bo no tin nada di ta haci como mandatario den un caso civil di un organisacion civil contra e compania y gobierno, pero mester actua como e ministro cu en berdad tin e autoridad pa actua, pasobra e permiso duna ta bisa bon cla cu ta prohibi pa kita o destrui, parcial o totalmente, especienan endemico, sin permiso di e ministro aki. Pa di tantisimo biaha ta mustra cu ainda e ministro ta un nobato cu a ser gara ‘off guard’ pa su colega di coalicion. Loke mester a haci ta exigi un accion conhunto gubernamental, pa pone e compania cumpli cu contenido di e permiso, cu e propio promer ministro a firma, y laga suspende e obra, y si mester, revoca e permiso te ora e compania cumpli. Si enberdad e promer mandatario ta para pa accion unifica di gabinete, oblig’e haci exactamente esey. Pero esey no a sucede, asina leu cu nos a comprende.

Pa calma e asunto, awor nos ta haya di tende cu pa ‘bienestar di nos’ ta laga e asunto asina. Nos tin un otro vision riba e asunto aki. Nos ta kere cu ta bon pa cuminza pensa kico ta recomendable pa e partido haci pa su mes bon. Loke por observa actualmente ta cu cada incidente cu tin ta termina den derota pa e partido ‘junior’ den e coalicion, cu consecuencia cu e pregunta grandi cu ta surgi ta: cuanto base di apoyo e partido tin ainda? Nos no ta bisa esaki pasobra nos ta desea nan malo, sino cu nos ta observa e mesun tipo di proceso cu a hiba tur anterior partner menor den coalicion na un bida politico bastante cortico. E trayecto a cuminza cu e contrato secreto cu Eagle LNG, despues e confrontacion encuanto e ley di matrimonio pa pareha di mesun sexo, cu nos no ta mira keda trata mas tampoco, ya cu gobierno ta wardando resultado di e caso di casacion riba e sentencia di Corte Comun. Cu e asuntonan pisa cu mester maneha proximamente, entre otro e problemanan cu Hulanda, por lo pronto e partner ‘junior’ no tin ningun bataya gana, ni na bienestar di pueblo, ni di nan mes.