Dialuna ultimo, minister di Enseñansa y Deporte, Endy Croes a anuncia e proyecto piloto cu lo cuminsa na augustus di e aña aki pa e dos Scol Practico pa Ofishi (SPO) ubica na Brazil y na Santa Cruz unda despues di varios conseho y reunionnan a logra extende e proyecto pa un aña 4 y 5.
Di loke ta trata introduccion, minister Croes a splica cu nan ta bay introduci e proyecto piloto pa aña 4 y 5 unda el a papia cu expertonan di Dienst Publieke Scholen (DPS), Directie Onderwijs y Office Openbare Avondleergangen (OAA), management di SPO Santa Cruz y SPO Brazil a traha riba e peticion aki pa haya sa si tin e necesidad pa logra aumenta e añanan di estudio na SPO cu na e momentonan aki ta di 3 aña so.
E motibonan pa esaki, ta entre otro, studiantenan ta caba scol den edad mucho jong cu un averahe di 15 aña y nan no por drenta den mercado laboral, tin tiki oportunidad pa por core cu pasantia y e continuacion pa EPB no ta optimal.
Pa e motibo ey, tambe a solicita pa haci un investigacion y prepara pa implementa e proyecto piloto pa aña 4 y 5 e cual tin como grupo meta studiantenan cu cierto limitacion leve, diagnostico di autismo, ADHD y/of otro tipo di problema di comportacion; ademas di alumnonan actual cu ta den 3 aña y no ta alcansa e criterionan pa continua cu EPB, alumnonan di IPO klas, alumnonan cu aña escolar anterior no a ser acepta na EPB y cu no ta mas bieu cu 18 aña di edad.
Tocante e programa cu ta bay ofrece, minister Croes a señala cu lo ofrece ABO nivel 1, Arbeidsmarkttoeleiding y pa aña 5 lo tin trabounan regular of beschut/beschermd werk y ta continua pa ABO nivel 2.
Di loke ta trata ABO nivel 1/entreeopleiding ta prepara e alumno pa e mercado laboral como “assistent basisberoepsbeoefenaar y tambe lo por sigui studia na nivel ABO nivel 2, e trabounan di assistent ta menos complica y ta rekeri un forma di pensa y actua riba un tempo mas trankil, pa asina ey nan por adapta nan mes y compronde, pa nan por haya trabou den futuro.
Estudionan ABO 1 tin como grupo meta alumnonan di aña 3 cu no por continua den forma optimal na EPB cu un programa combina di bay scol 2 of 3 dia y bay stage 2 of 3 dia, esaki lo tin un duracion di 2 aña caminda na final nan ta haya un diploma y alumnonan cu no por alcansa e nivel por ricibi certificado di cual despues nan por continua nan studionan na OAA.
Pa e opleiding ABO 1 nan ta bay ofrece assistent dienstverlening, assistent bouwen, wonen en onderhoud, assistent Horeca, voeding en voedingindustrie, assistent plant, dier of groene omgeving tanto na Santa Cruz como na Brazil.
Pa cu e IPO, e acceso na mercado laboral ta trata di actividadnan cu ta yuda prepara e alumno pa haya un trabou di cual e por ricibi pago pa sea independiente of bou guia, esaki ta dirigi pa e grupo meta di alumnonan di aña 3 cu ta den IPO klas y cu no por continua na EPB, e programa di enseñansa ta inclui un leerwerktraject di 3 dia di stage y dos dia na scol, e meta ta pa un stage adecua cu ta bira un oportunidad pa trabou.
E trayecto aki lo tin un duracion di un aña escolar, na final di e trayecto e alumno ta ricibi su ‘praktijkverklaring’ y e alumno lo continua ricibi guia na distancia despues di e prome aña di stage pa preveni e sali afo di e sistema.
Segun minister Croes a declara, den un conseho of un advies nota di Directie Onderwijs di aña 2017 a señala cu SPO no por keda tres aña y e tin cu ser extendi, pa esaki, ora nan a tuma nota di consehonan di Departamento di Enseñansa ademas di e kehonan di mayornan unda nan ta sigura cu nan yiu no por continua nan studio pa diferente factor menciona caba e cual tin como consecuencianan cu hobennan ta keda cas a dicidi di tene reunionnan cu instancianan diferente cu e idea cu nan kier cuminsa e proyecto piloto aki na augustus venidero.
“Na final di mei nos a haya full un presentacion, unda tur stakeholders tabata hunto pa asina informa nos con e plan ta bay ta pa augustus 2024 nos cuminsa cu e proyecto aki.” Minister Croes a bisa.
Igualmente minister a menciona cu nan a compronde cu tin studiantenan cu a termina e derde jaar aña pasa y na e momentonan aki tin un aña na cas cu nan no por conecta, nan tambe ta bay haya e oportunidad pa augustus di e aña aki por sinta y continua cu nan studionan.
Potretnan ta pertenece na SPO nan Facebook page.
