Fundacion Lanta Papiamento (FLP) a organisa un tertulia literario cu a conta cu presencia di minister di Enseñansa, Rudy Lampe, pa asina clausura Aña di Papiamento 2018 na Biblioteca Nacional Aruba.

Presidente di e fundacion aki,  Eduard Pieters, a expresa palabra di danki na tur esunnan cu a duna contenido na e aña special aki, caminda ortografia oficial di Papiamento a keda aproba den parlamento. Pero tambe na e autornan cu a produci obranan e aña aki, y cu algun di nan a wordo invita den e tertulia literario Cosecha 2018 pa papia di nan obranan, entre nan: Rosabelle Illes, Belen Kock-Marchena, Dufi Kock, Jerry Franca, Benjamin Romero/Ramon Todd Dandaré y Daniella Britt. Cada un di nan a ricibi un certificado di aprecio otorga pa FLP.

Minister Lampe a declara na Bon Dia Aruba cu e tabata un Aña di Papiamento 2018 ‘sumamente exitoso.’ P’esey e ta haya cu e palabra cu FLP a uza pa batisa e tertulia aki como cosecha di 2018, ta esun mas ideal pasobra e cosecha tabata grandi.

Logronan di Aña di Papiamento

Un echo historico tin di haber cu dia 1 di november ultimo, nos organo legislativo a oficialisa ortografia di Papiamento of buki blauw. Y recientemente pa ‘corona e obra’ nan a lansa e app di Papiamento.

El a declara cu danki na Setar cu cualkier persona por baha e aplicacion aki den nan smartphone si nan tin un android. Den futuro tambe lo ta disponibel pa Iphone. “Asina bo por skirbi Papiamento na un manera corecto,” el a bisa.  Tambe via e app aki nan ta divulga tur informacion cu tin di haber cu Papiamento. E mandatario a agrega cu via e app aki bo por tin tur informacion den bo plant’i man.

Otro logro di e aña aki dedica na Papiamento tin di haber cu a wordo lansa e SAM of Scol Arubano Multilingual, unda Papiamento ya ta parti di e maneho nacional di enseñansa. “Den tur scol na Aruba, Papiamento ta bay bira e idioma di instruccion for di scol preparatorio”, el a bisa.

El a anuncia cu na luna di februari of maart proximo, nan lo bin cu un conferencia pa sigui cu e preparacion di e SAM. E intencion ta pa augustus 2019 tur scol preparatorio ta start cu Papiamento como idioma di instruccion, banda di e otro tres idiomanan: Hulandes, Ingles y Spaño.

Tambe den e Aña di Papiamento 2019, gobierno a firma acuerdo di cooperacion pa e intercambio di material na Papiamento cu Corsou y Bonaire na luna di januari venidero. Ya esun cu Corsou nan a keda firma caba luna di september ultimo. E mandatario a indica cu esaki ta permiti cu hopi material na Papiamento ta bay drenta den nos scolnan.

Tambe na luna di november a tuma luga un conferencia cumbre cu e islanan ABC (Aruba, Boneiro y Corsou), organisa pa FLP. E tabata un conferencia grandi cu expertonan di e tres isla aki y tambe Hulanda. El a bira un plataforma caminda diferente ideanan valioso a bin dilanti cu ya a  bay den un mocion. Ta asina cu parlamentario Ricardo Croes (RED) a presenta un mocion aproba unanimamente pa crea un academia di Papiamento. Igualmente minister Lampe a referi cu e aña aki Dr. Joyce Pereira a haci un disertacion di su tesis tocante Papiamento na Universidad di Corsou cu a duna un ambiente di celebracion inolvidabel.

Despues di haci un balans di tur e logronan aki, el a afirma cu Aña di Papiamento 2018 tabata uno exitoso y fructifero. “Mi mes no a kere ora cu nos a decreta aña 2018 como Aña di Papiamento cu e lo ta un aña asina exitoso cu asina hopi cosecha”, el a declara na Bon Dia Aruba.

E mandatario a agrega cu esaki tabata un forma pa recorda cu na 2003 -kiermen 15 aña pasa-  Papiamento a bira nos idioma oficial . Ya faltando poco dianan pa 2018 cera, e mandatario ta mira e aña aki di hopi recuerdo “masha bunita mes”.