Ayera tabata World Down Syndrome Day, un dia specialmente dedica pa crea conscientisacion ariba e condicion Down Syndrome. Na december 2011 Asamblea General a declara 21 di maart como Dia Mundial di Down Syndrome y a dicidi, cu efecto for di 2012, pa observa Dia Mundial di Down Syndrome cada aña riba 21 di maart pa aumenta consciencia publico tocante Down Syndrome.
Down Syndrome ta sosode ora un individuo tin un extra parti of henter copia di cromosoma 21. Te ainda no sa pakico e sindroma aki ta sosode, pero Down Syndrome semper a forma parti di condicion humano. E condicion aki ta existi den tur region riba mundo y ta resulta den efectonan variabel riba estilonan di educacion, caracteristicanan fisico y salud.
Segun Organisacionnan di Nacionnan Uni ta indica, acceso adecua na cuido di salud, na programanan di intervencion tempran y na educacion inclusivo, manera tambe investigacion adecua, ta vital pa crecemento y desaroyo di e individuo.
E calculacion di incidencia di Down Syndrome ta entre 1 den 1.000 pa 1 den 1.100 nacemento rond di mundo. Cada aña, aproximadamente 3.000 te 5.000 mucha ta nace cu e condicion di cromosoma aki.
E calidad di bida di hende cu Down Syndrome por mehora door di satisface nan necesidadnan di cuido di salud, incluyendo chekeo regular cu profesionalnan di salud pa monitor e condicion mental y fisico y pa duna intervencion na momento cu ta necesario.
Individuonan cu Down syndrome por alcansa un calidad di bida optimo door di cuido y sosten di mayornan, guia medico y sistemanan di sosten basa riba comunidad manera educacion inclusivo na tur nivel. Esaki ta facilita nan participacion den comunidad principal y e logro di nan potencial personal.
E aña aki e tema pa celebracion di Dia Mundial di Down Syndrome ta “Pone fin na e stereotiponan.” Un stereotipo ta un idea cu hende tin tocante con un persona of algo ta. Stereotiponan por ta positivo, negativo of neutral, pero hopi biaha nan ta robes, of simplemente un mentira.
Pa hende cu Down Syndrome y desabilidadnan intelectual, stereotiponan por para nan for di wordo trata manera hende normal. Den hopi caso nan ta wordo trata manera mucha, nan ta wordo subestima y nan ta wordo exclui. Den algun caso hasta nan ta wordo maltrata of hasta abusa.
Na Aruba e dia special aki no a pasa sin mas. Riba rednan social diferente organisacion, scol y persona a uni na e celebracion di e dia aki y a publica nan potret(nan) cu nan meanan di color bisti, pa yuda crea conscientisacion y pone fin na stereotiponan.
Na Aruba e individuonan cu e condicion aki tambe ta lucha pa ta inclui den comunidad den tur nivel y danki na organisacionnan cu ta lucha hunto cu nan, durante e ultimo añanan, e inclusion a crece, pero ainda falta caminda pa cana.
Potretnan: Facebook
