Despues cu e baby di aña a wordo conoci, tur atencion a bay dirigi riba e mayornan di e yiuchi principalmente pa e edad hoben di e mama (menor di edad) y e tata cu ta mayor di edad. Mas reaccion mixto a sali na cla ora a tuma nota cu ta un pareha supuestamente casa como ambos mayor ta carga e mesun fam.
Segun 24ora den un entrevista cu Censo, “Si un mucha muhe di 15 aña a casa, e matrimonio ey ta ilegal, tanto na Aruba como na Venezuela. Un mucha di 15 aña no por casa, ni cu consentimento di su mayornan”, asina mr. Sharin Luydens a garantisa, como aclaracion riba e noticia cu e mama di e baby di aña a casa y como tal ta un mayor di edad awo.
E director di Censo y Registro Civil a splica, manera cu nos a informa ayera caba, cu leynan Hulandes ta reconoce matrimonio entre mayornan di edad, pues un minimo di 18 aña di edad. E ley ta haci un excepcion den caso cu e mucha muhe ta na estado y lo permiti casa cu un edad minimo di 16 aña, cu consentimento di mayornan. “Pero pa casa cu 14 of 15 aña no ta posibel, ni cu mayornan firma, ni si pidi permiso di Minister ni ningun hende. Esey ta un acto contra ley, es mas, e ta castigabel tambe”, di acuerdo cu mr. Sharin Luydens.
El a confirma cu e matrimonio di e pareha ey, si ta berdad anto, no a tuma luga na Aruba y e por sigura cu na Censo di Aruba e matrimonio ey no ta inscribi y no por wordo inscribi tampoco!
Mester tene cuenta cu leynan pa derecho di mucha ta proteha e menor di edad y ta haci e mayor di edad cu tene relacion sexual cu un mucha culpabel di un delito criminal. Pues, si bo tene relacion cu un menor di edad y despues bira casa cune, no ta legalisa e hecho cometi. Den un caso asina semper Fiscal di Ministerio Publico por scucha e mucha y ainda persigui e tata di e baby.
Censo Aruba a yama nan coleganan na Venezuela cu a sigura cu ey tampoco ta permiti matrimonio infantil. Pues na Venezuela ta permiti pa casa cu 18 aña y ta haci excepcion cu consentimento di mayornan pa casa cu 16 aña pero hamas cu 14 of 15 aña di edad. Bisando esey, awor tin duda si e pareha ta casa mes.
E director di Censo a aclaria cu berdad ora un menor di edad casa e ta bira un adulto, pero esey tin limite. Pues no por ta asina cu un homber mayor di edad ta saca un mucha di 14 aña na estado, core casa cune, anto asina “scapa” di persecucion penal pa e delito criminal di tene relacion sexual cu un menor di edad.
