Na Aruba naturalesa ta presente pero mester cuida nan

“Aruba Point to Point’ ta e buki producto di e trabou cu e fotografo Venezolano, Federico Cabello a realisa henter un aña riba nos isla. 

Cu su camara e fotografo profesional aki a explora punto pa punto e naturalesa bunita y sitionan masha exotico di nos pida di baranca, y despues el a compila nan den forma di potretnan riba e buki menciona. E ta un buki destina pa e turistanan, pero tambe pa nos hendenan local pa cada un di nos siña aprecia y balora loke nos tin.

Aruba su naturalesa ta unico

Durante un entrevista cu Bon Dia Aruba, Federico Cabello, a laga sa cu Aruba tin hopi pa ofrece. El a yega di realisa e tipo di trabou fotografico aki entre otro na Bonaire y tambe cuater buki inspira riba e parke natural Los Roques na Venezuela. Sinembargo Aruba su naturalesa a impacte hopi mes. 

Tambe el a yega di bishita otro destinacion turistico, y aunke e ta elogia e servicio y infrastructura turistico cu nos tin, e ta haya masha relevante cu na “Aruba e naturaleza ta presente. E naturaleza ainda ta protagonista di e isla. Algo cu obviamente mester cuida”.

Algo cu a causa un impacto cerca e fotografo aki ta e diferente boca situa rond di nos isla, specialmente den e parti Noordkant. E tin pensa di bin cu un exposicion dedica exclusivamente na e bocanan di Aruba manera Boca Budui, Boca Grandi, Boca Mahos, etc… E ta haya bon cu e operadornan turistico ta ofrece tour den e sitionan aki, ya cu e bishitantenan tin contacto cu e “naturaleza puro”. Pero un aspecto cu nos no mester perde fei bista ta esun di e sostenibilidad. Esaki considerando di un banda e beyesa natural di nos isla, pero di otro banda e desaroyo turistico y di nos poblacion.  

“Mester tin un ekilibrio. Esaki ta e palabra magico cu e naturalesa a siña nos tambe”, el a bisa. E ta haya cu e desaroyo por lo bay man na man cu e naturalesa. El a disfruta di e parti salvahe di nos isla, y e ta haya cu tin espacio pa bin cu e tipo di huesped chikito respetando e naturalesa manera Rancho Daimari. E ta algo –segun Cabello- yamativo pa e turistanan amante di e naturalesa. 

“Mi ta kere cu esaki ta un tipo di turismo cu Aruba lo por desaroya positivamente, y lo trece un ekilibrio cu e resto”, el a bisa. 

Segun Cabello, e tipo di turismo ecologico aki tin un segmento hopi importante den e mercado turistico internacional. E ta e tipo di turista cu ta disfruta di e diferente boca cu nos tin rond di nos isla. Esun cu ta disfruta di e bahada di solo of ora cu e solo ta lanta. E ta agrega cu esaki lo por ta un desaroyo turistico ideal y sostenibel den e area di Noordkant di nos isla.

Proteccion 

Naturalesa ta keda central den e trabou fotografico cu sr. Cabello a yega di realisa. E ta un amante di naturalesa y un defensor di medio ambiente y ecologia. Esaki ta un compromiso pe, ya cu el a bin documenta e beyesa natural di Aruba. Pa tal motibo e ta sugeri un plan di limpiesa regular di e bocanan. 

Durante su trabou, el a observa cu e sushinan haya den e sitionan aki ta minimo pa loke e mesun turista ta produci durante su bishita na nos isla. Pero e bocanan a bira manera un pikido natural di sushi cu ta bin fei lama bruto. P’esey e ta haya importante pa mantene e sitionan aki limpi di e sushinan cu ta bin di afo y cu lama ta spula nan. 

“Bale la pena pa bin cu plan di limpiesa di e bocanan, ya cu lo ta un lastima, ya cu tin biaha bo ta haya pida di muebla grandi eynan”, el a trece dilanti e punto aki di un forma constructivo.

E buki “Aruba Point to Point” ta e di dos di un coleccion cu e tin pensa di bin cun’e. E tin como proyecto realisa un trabou fotografico na Corsou y asina esunnan interesa lo por tin e coleccion completo di e islanan A-B-C.  E concepto di e coleccion aki ta totalmente relaciona cu e nomber “point to point”, ya cu aunke e ta un obra tipo “coffee table book” pa deleita bo bista cu e potretnan, e tin su propio structura. 

E structura ta cu bo ta haci un recorido di e isla punto pa punto. Den e caso di Aruba e ta registra 41 punto bon organisa riba un mapa como referencia. “Asina ta manera mi ta wak e cos aki, manera un aventura”, el a bisa. 

Sr. Cabello a splica cu el a structura esey asina ya cu ora e ta yega un sitio e ta desea descubri e sitio ey. E buki Aruba Point to Point ta bira un instrumento pa mira kico abo kier wak, y tambe e ta bira un guia. E buki aki ta un souvenir ideal pa e bishitante y tambe e ta bira un herment pa mustra na bo amigonan e sitio cu bo a bishita. E ta riba mercado di Aruba caba. 

“E idea tras di e buki ta pa e hendenan lo por bay cu un pida chikito di Aruba pa su cas, y despues nan lo por mustra nan na otro persona”, asina el a declara na final di su declaracion na Bon Dia Aruba.