Prome minister, Evelyn Wever-Croes a reafirma loke ya caba minister di Finanzas y asunto Economico, Xiomara Maduro, a yega di anuncia: Gobierno ta bay traha riba cumplimento di pagamento di impuesto pa medio di instrumento di boet pa mal pagado.
E aña aki e parti di cumplimento di belasting gobierno lo pone mas central. Asina lo evita mas aumento di impuesto. “Na fin di dia, cada ciudadano di pais Aruba su deber ta pa cumpli cu su parti husto pa loke ta toca gobierno na belasting,” el a bisa. E hecho cu tin ciudadano cu no ta cumpli cu su compromiso fiscal di impuesto ta haci cu otro ciudadanonan mas responsabel mester cumpli dobel.
El a trece como ehempel e pagamento di belasting riba number di auto cu a wordo prolonga, y ya faltando poco pa e ultimo fecha cu gobierno a duna te fin di februari, ainda tin cantidad di hende cu no a cumpli cu e pago aki.
E parti di cumplimento riba pago di impuesto ta un tema cu nan a trece pa dilanti desde cu nan a drenta den gobierno, caminda nan a bin cu e crisisheffing. Pues nan lo percura cuminsa cobra e placa cu mester a drenta den caha di gobierno, ya cu esaki ta yuda pa paga e gastonan cu gobierno tin, sin mester di bini cu medidanan adicional pa pueblo.
Pero di otro banda, gobierno a constata – y CAft tambe – cu e sector comercial ta cumpliendo miho cu e pago di belastingnan manera AZV y SVb. Esaki ta conta cu e pago di loonbelasting y e BBOnan. “Nos ta mira un mehoracion riba esaki y esaki nos ta aprecia enormemente,” el a declara.
