E analisis di Forensic Services Caribbean riba e maneho di Refineria di Aruba a ilustra cu a gasta un total di Awg 441.969,54 entre October y December 2016 pa diferente evento. Ta trata aki di e Christmas Village, e Ice Skating Ring, gastonan pa celebracion di reapertura di e refineria bao nomber di CITGO, y celebracion di Pasco pa empleadonan.
E decoracion pa e Christmas Village den e Carnaval Village a costa mas di 38 mil florin, mientras cu e ice skating rink, ekiponan di zonido, luz, stoel y mesa, cura y otro a sali casi 250 mil florin.
Na 2017 a gasta casi 305 mil florin na eventonan, y tabata trata gastonan cu a haci na 2016 y a keda paga na 2017. Esakinan tabata relata na apertura di e edificio di RDA cu a costa 75 mil florin. Old Timers Event tabatin un costo di 34 mil florin, cu ta inclui den e mas di 47 mil florin cu a bay pa gasto di mercadeo di e fiestanan aki.
