Ya caba nos ta na porta di fin di aña 2015, caminda Mediador di Gobierno Sr. Anselmo Pontilius a duna un panorama riba e desaroyo cu a tuma luga tocante firmamento di Contracto Colectivo (CAO) y referendum.
“2015 tabata e aña cu tabatin mas actividad di e sindicato pa loke ta negociacion di CAO”, asina Sr. Pontilius a declara na Bon Dia Aruba.
Negociacion CAO
Compara cu aña pasa, Mediador di Gobierno su asistencia tabata bastante durante 2015. Sr. Pontilius a declara na e matutino aki cu e aña aki su oficina a intermedia mas, pasobra nan a haya mas negociacion di CAO den 2015. Hopi biaha sindicatonan manera FTA, STA , SEPPA y ABV ta esunnan cu ta negosha CAO, pero tin un periodo cu no tin negociacion, pasobra tin CAO cu un vigencia di dos pa tres aña. Loke e ta premira ta cu aki tres aña hopi CAO lo vence na aña 2017-2018.
E aña aki oficina di Mediador di Gobierno a dedica basta tempo den e proceso di negociacion pa firma e prome CAO na IMSAN. Tambe na Horacio Oduber Hospital, ANSA y asina un serie di CAO a wordo firma. Recientemente na mita di e luna aki a wordo firma un acuerdo entre WEMA y STA. Tambe un acuerdo entre SEPPA y LGS cu ta un compania di 200 trahado cu ta atende cu pasaheronan y ekipahe na aeropuerto. FTA tambe a firma un CAO cu Riu Palace cu ta importante debi na e situacion turbulento cu nan tabatin durante 2015.
Ainda ta pendiente un intermediacion caminda STA a pidi pa atende cu ATA un negociacion di CAO cu apenas nan a cuminsa. E trabou aki a start y lo continua na januari awor. Tambe aña lo habri y sindicato UEA (Union Electricista Arubano) lo negosha un CAO cu gerencia di Elmar. SIWA ta negosha un CAO cu gerencia di WEB. Pues aña 2016 lo habri cu tres negociacion di CAO den tres empresa estatal hopi importante.
“No mester lubida cu ta Contracto Colectivo cu pa hopi aña ta existi”, el a bisa. Den caso asina no necesariamente Mediador di Gobierno mester intermedia y semper nan ta encurasha pa ambos parti envolvi nan mes como partido keda na mesa te ultimo momento. Den caso cu Mediador di Gobierno mester bin aden ta pasobra berdaderamente e partido no por haya otro.
Referendum
Si nos ta tira un mirada atras na 2002 tabatin 13 referendum cu a tuma luga; y un decada despues na 2013 tabatin 11 referendum; na 2014 tabatin 7 referendum so y e aña aki tabatin un total di 9 referendum. Di nan STA y FTA ta esunnan cu mas a pidi referendum. Tin algun di nan cu a bay dor y otro cu a wordo cancela. Pero e echo ta cu tabatin un cantidad di referendum den diferente companianan.
Ariba su mes, Mediador di Gobierno ta cualifica 2015 como un aña basta activo den intermediacion. De todo caso nan a percura pa atende e solicitud di e sindicatonan cu a pidi pa intermediacion, pero igualmente Mediador di Gobierno ta duna conseho, ya cu hopi biaha no necesariamente e partido tin cu bin mesa.
Tin caso cu ya sea e sindicato of e dunado di trabou ta yama, y oficina di Mediador di Gobierno ta atende cu hopi di e casonan aki, sin cu nan mester yega personalmente na nan oficina.
Tambe e oficina aki a yega di atende algun caso y referendum na Bonaire durante 2015 cu ta separa di e trabou cu sr. Pontilius ta realisa na Aruba, pero tambe ta un trabou di mediacion. Tabatin cuater referendum na e isla di St. Eustatius cu tabata un echo hopi singular.
