Banco di Seguro Social (SVb) a cuminsa controla companianan pa determina si nan ta cumpliendo cu ley cu ta obliga nan pa sigura nan trahadonan cerca SVb. Prome resultado: 45% di trahado no ta sigura na 106 empresa controla.
E instancia a institui cuater team y for di februari ultimo nan a cuminsa realisa control nan den oranan di anochi y na cualkier dia di forma sorpresa. Nan ta controla cierto area y sectornan di nos economia. Durante e ultimo 5 luna nan teamnan a bishita 106 empresa di cual a bin resulta cu 8 empresa no tabata registra na SVb manera ley ta stipula.
Director di SVb, Edwin Jacobs ta informa cu di e total di empresanan aki cu 322 trahado, 149 no tabata sigura (casi 45%). “Pa nos ta duna indicacion cu mester continua cu e control den oranan di anochi aki, pasobra tin trahadonan cu no cumpliendo cu e ley di seguro di malesa y accidente.”
Hungando sabi
El a indica cu tin empresa of personanan cu kier hunga sabi bisando cu e persona no ta un trahado, sino cu el a bin pa yuda un rato. Pero e por sigura nos comunidad cu SVb tin e instrumentonan pa sa ora cu un hende ta trahando of no. Ora cu nan teamnan di control ta bay un empresa, ya caba prome nan a vigila e empresa varios dia caba.
E ta haci un apelacion na e dunadonan di trabou pa duna nan trahadonan e proteccion cu nan tin derecho na dje. Di e forma aki nan por evita cu mañan algo pasa caminda bo ta perhudica e persona, y despues abo mes como dunado di trabou ta para responsabel personalmente pa e accidente of cos cu eventualmente por pasa cu bo trahado.
“Duna e trahado e siguridad cu dia e malesa ta toca na porta, e tin un entrada pa cay riba dje y abo como doño di trabou no mester sigui page su salario y ainda paga un hende pa bin reemplas’e. SVb ta pag’e y abo ta page esun cu ta bin reemplas’e.”
Multa administrativo
SVb lo duna dos presentacion riba nan maneho di multa administrativo na e organisacion di dunadonan di trabou, Atia. Nan lo tuma luga riba dia 31 di mei y 1 di juni awor pa e dunadonan di trabou ta na altura di e aplicacion di multa proximamente y kico e reglanan aki ta contene.
Director Jacobs kier recorda cu desde 1 di juli 2016 SVb tin e autoridad pa duna multa. For di e momento ey e instancia aki a cuminsa traha riba e maneho di multa. Nan mester tene na cuenta cu tur e sentencianan cu tin den Corte Europeo tambe pa loke ta trata maneho di multa. “Unabes cu nos a keda cla cu esaki, nos a publica nan 1 di april.” Kiermen for di e fecha aki e tres luna a cuminsa core y entrante 1 di juli awor SVb lo cuminsa duna multa.
Conforme na e sentencia di Corte na Europa ta indica cu nan mester duna un plaso di tres luna prome cu nan lo cuminsa ehecuta e ley. SVb a palabra cu gobierno tambe cu den e periodo di tres luna prome cu nan ta implementa e multa, nan ta bay informa ampliamente tocante e multa.
SVB lo sigui implementa nan control y p’esey nan ta haci un yamada pa e empresanan por cumpli cu e ley di seguro social di nan trahadonan. Sr. Jacobs ta bisa cu mayoria di empresa cu nan a acerca ta cumpliendo y ta percura cu nan trahadonan ta registra na SVb. Tin biaha nan por ripara cu tin confusion cu e personanan cu ta traha part-time, si mester ta sigura si of no. Director di SVB ta splica cu personanan cu ta traha part-time, tambe mester wordo sigura.
