(AP) – Myanmar, lidera pa ehercito, riba diamars a bolbe permiti prizoneronan ricibi bishita di familiarnan, un derecho cu a suspende pa 3 aña y mei a causa di e pandemia di coronavirus, segun e oficialnan di prizon y militar a bisa.
E regla permitiendo e bishitantenan ta carga condicionnan detaya, pero esaki ta e prome oportunidad pa varios di e detenidonan politico cu tin tempo encarcela a causa di oposicion na e ehercito.
E bishitantenan mester por provee prueba di vacuna di coronavirus y un relacion familiar cu e prizonero. Ta rekeri documentacion tambe for di e oficinanan di administracion di bishitantenan local y departamentonan di polis. Un miembro di e famia di un prizonero acusa di traicion a causa di protesta e liderazgo militar a conta The Associated Press cu el a ser permiti bishita su yiu homber pa mas o menos 20 minuut den un camber grandi despues di a warda casi 2 ora cu mas di 100 otro bishitante. El a bishita un prizon na Bago.
El a conta cu e tabata contento cu e por a mira su yiu atrobe despues di mas di un aña y di por hiba medicamento y placa despues cu el a wak e na su huicio den augustus di aña pasa. E bishitantenan mester a papia cu e prizoneronan for di 30 meter leu segun e muhe, ken a conta bao anonimidad pa asina no ser identifica, mirando cu e ehercito ta prefera di ta e unico fuente di informacion ora ta trata di topiconan sensitivo.
Assistance Assiociation of Political Prisoners, un grupo cu ta mantene record detaya di e arestonan y mortonan relaciona cu e gobierno militar, a bisa cu 25,337 persona a ser aresta desde cu nan a tuma mando den aña 2021 y 19,616 di nan te ainda ta den detencion.
