Ayera mainta den Parlamento di Aruba a tuma luga reunion publico number 17 durante cual 18 miembro di parlamento a vota pa e vice presidente nobo di Parlamento di Aruba pa resto di e periodo 2024-2025.

Manera ta conoci votacion ta ser realisa den dos tanda. Durante e prome tanda ta vota pa e prome nomber cu parlamentarionan ta desea pa bira vice presidente y e prome nomber cu ta ser manda pa aprobacion di Gobernador di Aruba SE Alfonso Boekhoudt.

Durante e di dos tanda ta vota pa e di dos nomber cu ta bay pa Gobernador di Aruba, cu den caso cu e prome nomber cu a ser manda no ser aproba pa Gobernador, e di dos nomber por keda aproba como vice presidente, cual ta algo cu en realidad no sa pasa.

E comision cu a keda encarga cu conteo di e votonan tabata consisti di parlamentario Mike de Meza di AVP cu tabata presidente di e comision y Ruthlyn Lindor (Futuro) y Otmar Oduber (PPA) cu a ser nombra miembronan di e comision aki.

Durante e prome tanda di votacion Muzannin Wever di fraccion Futuro a sali victorioso cu 12 voto, Gino Goeloe di fraccion Futuro a haya cinco voto y Mike de Meza di fraccion AVP a haya un voto.

Durante e segunda tanda di votacion Ruthlyn Lindor di fraccion Futuro a haya 12 voto, y bira e di dos nomber cu ta ser manda pa Gobernador di Aruba, y Gino Goeloe, tambe di fraccion Futuro, a haya seis voto.

Diahuebs atardi tambe a tuma luga e votacion pa presidente di parlamento. Manera ta conoci despues di resultadonan di eleccion, durante e prome votacion pa presidente di parlamento di e constelacion nobo, Gerlien Croes, lider di partido Futuro a keda eligi como presidente di parlamento y Melvin Wyatt-Ras como vice presidente di parlamento.

Como cu ambos, Croes y Wyatt-Ras, ta forma parti di Gabinete AVP-Futuro, parlamento a vota pa e presidente nobo pa e resto di aña parlamentario 2024-2025.

Durante e prome tanda di votacion, e prome nomber pa presidente di parlamento, Sneek a sali victorioso cu 13 voto na fabor y parlamentario Hendrick Tevreden di fraccion MEP a haya ocho voto.

Den e di dos tanda di votacion, pa scoge e di dos nomber pa presidente di parlamento, parlamentario Jennifer Arends-Reyes di fraccion AVP a ricibi 13 voto, Shailiny Tromp-Lee di fraccion MEP a ricibi siete voto y Hendrik Tevreden a haya un voto.

E dos nombernan cu lo ser manda pa Gobernador di Aruba SE Alfonso Boekhoudt ta di Marlon Sneek y Jennifer Arends-Reyes.