E tabata candidato riba lista di partido AVP cu e number 15 pa eleccion na aña 2021, y ayera el a haci publico su retiro di e partido aki, pa motibo cu e no ta comparti e vision di partido y e ta sinti cu door di ta un persona profesional, critico, pero tambe cu principio, no ta pas den constelacion actual di e partido.
Asina a anuncia Muzaninn S.F. Wever den un comunicado di prensa, den cual a expresa: “Mi semper tabata AVP pero ‘by choice, not by chance’. Y esey tabata pasobra mi semper a kere den e ideologia di partido, e base fundamental cu a uni nos. AVP ta e partido di solucion y esun cu e vision progresivo pa futuro, e partido di personanan cualifica, profesional y cu un amor pa nos pais. Den e antesala pa eleccion 2021, prome cu gobierno a cay mes, AVP a envolve candidatonan, candidatonan potencial, activista y dirigentenan di bario den combersacionnan pa fiha un futuro pa e partido. Den esaki nos tur a carga e vision, entre otro, pa renobacion di partido, pa presenta nos mes como e unico opcion pa trece prosperidad back na nos pueblo, pa atrae young professionals cu gana pa sirbi Aruba. Mi a contesta e yamada aki y a acepta e reto cu speransa di por contribui positivamente na desaroyo y cambio real pa Aruba, pero tambe pa partido, cu un vision nobo, un biento fresco, pero cu sosten di e hala di experiencia. Esaki tabata mi expectativa.”
Igualmente el a sigura cu e rapport ‘devastador’ di CAD pa loke ta trata e acuerdo entre ex-minister Eddie Briesen y Tofanelli, na unda conseho positivo di un hurista di casacion pa continua cu e caso contra Briesen y e contract entre Gobierno di Aruba (de Meza) y Briesen pa libr’e di tur persecucion den futuro, ta un malhecho den dia cla. “No divulga e documentonan aki na bo coleganan den parlamento ta haci e malhecho mas grave ainda. Y pa net e coleganan wordo demonisa den nan mesun partido, pasobra nan a wordo gaña, ta manera culpa e victima y eleva e agresor.” E documento ta indica.
Ta conoci cu parlamentario di AVP, Benny Sevinger tin dos decision di culpabilidad di hues y e hecho cu e caso a inicia cu un persecucion politico “no ta e punto. Pasobra, asina mes, toch hues a constata dos acto condenabel. Ta posibel cu despues di apela e decision di hues, e wordo libra di culpabilidad. Esaki no ta kita afo cu awo, na e momento aki, e ta culpabel den wowo di ley. Y pa e periodo cu su caso ta pendiente, esaki no ta cambia. E hecho aki lo continua haci daño na e credibilidad y reputacion di partido y tur cu ta asocia na dje.”
Wever ta sigura cu “acepta, tapa, sconde y no reconoce ora algo ta inaceptabel of incorecto ta fomenta e daño di e caracter di nos pais. Personanan den posicion ta carga un responsabilidad mas grandi pa para riba nan orguyo. Nan mester pensa riba e pueblo y ki daño e desconfiansa den e organisacion cu nan ta representa por crea di un malhecho mes of e percepcion di un malhecho. E idea cu partido mester tin lealtad na cualkier individuo no ta sostenibel; lealtad mester ta pa pueblo.”
Pueblo ta continuamente sclama pa un politica nobo, un politica limpi, un politica cu no ta den beneficio propio sino den beneficio di tur, Wever ta menciona y “pa logra e meta aki mester evita e minimo apariencia di malhecho of conflicto di interes. Un politica nobo ta rekeri pa nos tur kita e bril partidario y wak hecho y duna credito of critica ora esaki ta mereci, ken cu e por ta, y mas ainda ora ta trata esnan den nos mesun circulo. Ora e control interno faya, e impresion publico di politica y di e politico ta sufri un kiebro ireparabel. E forma di politica mester experiencia un cambio.”
Pa finalisa, el a laga un mensahe na su votadonan durante eleccion 2021, “un danki atrobe; e honor ta di mi pa a ricibi boso confiansa y sosten di voto. Mientrastanto mi lo sigui sirbi pueblo den mi funcion diario y via organisacionnan cu mi ta forma parti di dje.”
Wever a participa den eleccion di aña 2021 como candidato number 15 riba e lista di partido berde unda el a haya 87 voto.
