Dialuna merdia a tuma un reunion cu caracter di urgencia entre e representantenan di Stichting Musica, AMA, Aruba Entertainment 2020, Departamento di Cultura y e representantenan di cluster #4 di CrisisTeam. Durante e reunion e instancianan representando e musiconan y e sector di artistanan a toca e tema di medidanan nobo pa e musiconan y con esaki ta afecta grandemente e musiconan cu ta biba di e arte cu nan ta eherce.
Señor Robert Maduro, di Departamento di Cultura ta splica cu DCA mester sali pa dilanti pa loke ta trata e parti cultural di Aruba, en representacion di e artistanan, no solamente musiconan, pero tambe artistanan, pintornan, escritornan, personanan cu ta haci obra di man, bailadonan, cu DCA ta regarda bou di nan plataforma amplio y grandi.
Segun loke Sr. Maduro a splica ta cu e organisacionnan cu ta representa e musiconan lo entrega un carta oficial, un peticion na CrisisTeam pa asina ki por pidi nan pa haci un excepcion pa loke ta trata e diferente scenarionan di musica.
“Bo tin musiconan cu ta biba 100% di nan unico entrada, cu ta musica, y nos sa cu den e sector turistico, e sector hotelero esakinan ta mas grandi. Ta pidi pa suavisa of adapta e medidanan ki pa e musiconan cu ta labora den e sector aki, pero consciente tambe cu nos ta den un situacion hopi dificil na e momentonan ki cu e contagionan ta asina halto, bo no por expect cu tur caminda bo tin cu tin e mesun cantidad di musiconan cu ta riba escenario. Nos ta compronde esey, pero bo tin cu tene cuenta tambe cu e unico cos cu ta pidi ta pa cierto musiconan keda cu nan trabou, vooral esunnan cu ta biba di dje”, Sr. Maduro a bisa.
E peticion oficial di parti di e musiconan ta pa tin un excepcion den e sector hotelero, specificamente pa e musiconan cu ta tin esey como un profesion, teniendo na cuenta e situacion actual di e isla. E carta cu ta bayendo pa CrisisTeam tin puntonan suficiente cu CrisisTeam por tene cuenta cune na momento di evalua un decision y esey ta e sugerencia cu a wordo treci pa dilanti.
Sr. Maduro ta splica cu entretenimento na hotelnan, pa turistanan ta un parti hopi importante di exporta y duna muestra di e cultura di Aruba, y mirando cu turismo ta e unico pilar, e ta importante pa e musiconan por entretene e turistanan cu ta bishita e isla. E ta bisa tambe cu DCA ta hayando señalnan for di e sector turistico cu tambe ta sinti e medida aki pasobra tin hopi turista actualmente na Aruba y toch nan ta desea di tin algun entretenimento pa nan.
Señor Sergio Tjin A Loi, representante di AMA, tabata t’ey presente durante e reunion y a comenta ariba e punto di mas importante cu a wordo discuti durante e reunion. Locual nos a discuti ta e musico cu ta traha na hotel, e musico cu en berdad ta depende di e entrada, anto mi ta para completamente tras di esey”, el a bisa. “Pa e musico aki nos mester pensa cu e no tin e entrada y cu nos mester para su tras como musico pa e por tin entrada. Den e situacion cu nos ta actualmente e no tin entrada”.
Sr. Tjin A Loi a splica tambe cu hotel ta exporta nos cultura y na momento cu bo limita e musico pa toca na hotel, bo ta limita tambe e exportacion di cultura di Aruba. “Hopi turista ta bin pa encontra sikiera algo di nos musica, kiermen e musico cu ta operando actualmente na hotel ta wordo limita no solamente den locual e kier expresa pa medio di su talento, pero tambe limita den exporta e cultura y e musico ey nos tin di cuminsa tene cuenta cune y dunele su balor y su luga”, el a bisa.
E representante di asociacion Aruba Entertainment 2020, Ofo Escudero tambe a tuma tempo pa remarca e importancia di e puntonan di discusion di e reunion. Sr. Escudero ta bisa cu e musiconan ta compronde completamente cu e isla ta den un situacion fastioso, actualmente, pero locual e ta enfatisa ta cu e musiconan ta pidiendo un excepcion pa area hotelero pa asina nan por tin nan entrada y por hiba pan na mesa pa nan famia.
“Locual nos kier pa compronde tambe ta cu nos no ta pidiendo pa tin fiesta, pa tin contagio y pa tin niun di e cosnan ey. Simplemente nos ta purba di protege esunnan cu ta mas vulnerable pa tipo di medidanan asina ki cu ta esunnan cu ta biba absolutamente y completamente di musica. E grupo di mas grandi di personanan cu ta biba di entertainment ta traha y ta biba di locual cu nan tin na hotel. E unico cos cu nos ta pidi ta pa haci un excepcion aworaki pa e area di hotel cu ta caminda mayoria ta gana nan pan 100%”, el a splica.
Señora Edwina Werleman, president di Stichting Musica tambe a dirigi algun palabra y a haci peticion, specificamente pa e personanan tin e pensamento cu toch mester tin fiesta, “por fabor no haci esey, ban keda un rato for di e fiestanan clandestino, ban duna e respet pasobra nos contagio ta hopi halto y kere mi cu nos musiconan ta preocupa pasobra si e contagio aki no baha nan pan ta keda na peliger. E decision di a yama awe cu urgencia e reunion aki cu crisis team ta netamente pa nos splica di cuanto di nos ta sin cuminda y mester cria nos famianan”, el a bisa.
