(DiarioLibre) – Musico Willie Colon, conoci tambe como ‘The King of Salsa’, a wordo admiti na un hospital na Virginia (Merca) despues di sufri un accident di trafico mientras e tabata biaha den un autocaravana cu su pareha, Julia, segun un comunicado di su hefe di comunicacion, Neil MacCarty.
Colon ta den ‘estado grave, pero stabiel’, e nota a sigura, cual ta detaya cu e accidente a tuma luga dia 20 di april ultimo mientras nan tabata biaha den un autocaravanan a traves di e region di Outer Banks, den estado di North Carolina.
Ekiponan di asistencia mester a saca e pareha for di e vehiculo pa motibo di e estado den cual esaki a keda despues di e accidente, y a traslada e artista na e hospital di Sentara Norfolk.
Su vocero a indica cu Colon a sufri un traumatismo craneoencefalico cu conmocion cerebral, corta na cabes pa loke tabatin mester di 16 punto, y fracturanan den su cervical C1, na e base di e craneo.
Ademas a precisa cu asina cu ta posibel, su team medico lo traslad’e na hospital Presbyterian na New York.
Di su banda, Julia Colon a sufri corta y contusionnan y a traslad’e na hospital di Outer Banks unda ya el a wordo duna di alta.
E nota, cu no ta duna detaye tocante e causanan di e accidente, ta sigura cu ningun otro vehiculo tabata involucra den esaki.
E comunicado ta compaña di un potret di e pareha y otro di e estado den cual e autocaravana den cual nan tabata biaha a keda despues di e suceso.
Willie Colon, kende na 2020 a celebra su 50 aña di carera musical, ta nieto di inmigrantenan Portoriqueño y a lanta den e bario Latino di e districto Bronx na New York, un hecho cu a marca su trayectoria personal y artistico.
