Eddie Kroon, musico local cu a toca den hotel pa hopi aña caba ta conta Bon Dia cu Aruba tin un conexion special cu su bishitante nan cu den su opinion ningun otro isla na mundo tin. Sr. Kroon ta splica cu turismo ta sosteniendo Aruba for di hopi decada pa e motibo aki y cu mester tene na cuenta ki tipo di cambio ta introduci den mundo di turismo pa no perhudica esaki.
Sr. Kroon ta bisa cu en berdad Cuba a habri su porta nan y esaki por wordo mira manera un competencia pa Aruba, pero den su opinion Cuba ni ningun otro isla den Caribe por competi cu Aruba.”Hopi turista ta yama Aruba nan di dos hogar pasobra akinan na Aruba nos tin un conexion cu e turista nan den un manera cu ningun otro isla tin. Ami ta di Curaçao, mi tin hopi aña ta biba na Aruba, mi por bisa bo cu eynan nan por ta mucho bruto den e aspecto aki. Na Cuba, nan ta nobo ainda y nan no tin e experiencia den trata cu turista manera aki na Aruba. ” Sr. Kroon ta splica.
Sr. Kroon ta splica cu tin hopi cos na Aruba pa traha riba dje den e contexto aki. ”E nivel di entretenimento y musica na Hotel nan a baha hopi. E banda local Super Mania tabata tin 11 aña na Hyatt Hotel ta toca musica den casino. Ora a caba, ta manda un carta cu ta bay cuminsa firma contract cada tres luna. Nos ta musico, pero nos ta hende cu ta traha, nos tambe ta obrero. Bo no por traha pa 3 luna anto despues di esaki bo no ta sigur si bo tin trabao of no. Sin laga afo, nos talento di musico nan 5 strea cu no solamente por toca cualkier hit cancion na Spaño, Ingles y Papiamento, pero tambe por conecta cu bishitante nan cu ta biniendo Aruba for di hopi aña nan caba, esaki riba su mes ta hopi importante pa nos turismo ” , Sr. Kroon ta splica Bon Dia.
Sr. Kroon ta agrega cu e kier sa ta ken ta esun cu ta tuma e tipo di decision nan aki pa trece cambio cu por perhudica un otro punto cu ta haci Aruba kico e ta awe. ”Corda bon, mi no kier gaba mi mes. Pero hende ta puntra, ‘Ki mishi Eddie Kroon na cas?” .Mi a traha happy hour na Manchebo, na Divi Divi hunto cu Lloyd Baptist y tambe 10 aña na Costa Linda hunto cu Astrid Muller kende ta un tremendo Manager y persona. Ora cu mi tabata toca na Costa Linda, nan a bisa mi cu mi no por keda den lobby mas pasobra mi a paketa e lobby . Nan a manda mi e pool pasobra e bar a cuminsa bende manera loco, fuera di laga nan bende bon, mi tabata conecta cu e bishitante nan cu tur aña tabata regresa y puntra pa mi te cu mi ta corda nan pa nomber y cua nan cancion faborito lo por ta” , Sr. Kroon ta bisa.
Si Aruba kier keda un isla 5 strea, tin hopi cosnan cu nos no por perhudica
”Si bo ta trahando un trabao, anto bo no ta produci placa, bo mester bay cas. Ki mishi un persona cu por produci 25,000 Florin pa gobierno den belasting na cas sin e habilidad of oportunidad pa haci esaki?”. Ami no ta contra paga belasting, si mi ta gana un bon salario na Hotel y mi belasting ta mas halto pa via di esaki, mi ta paga esaki manera debe ser. Ken ta tuma e decision nan aki? No por paga e musico nan un bon salario na Hotel pa nan trabao, pero e musico nan tambe ta yuda e hotel genera placa. Ami no ta compronde” , Sr. Kroon ta splica.
Sr. Kroon ta agrega cu e ta actualmente traha riba diasabra so mientras e tin experiencia y un nivel hopi halto. ”Mi no kier trapa riba ningun hende su pia, mi no ta solamente papiando pa mi mes. Na Aruba nos ta haya bishitante nan cu ta keda regresa. Ami a yega di toca na Bonaire, St. Maarten, Curaçao y den comparacion cu Aruba mi no a mira cu tin e mesun trato cu turista riba otro isla nan manera cu tin ki nan. Actualmente nos ta trahando riba un dia so, Nos no por yena nos saco cu un dia, e placa cu nos ta gana no ta yega . Fuera di esaki, ami ta haya cu e tradicion cu Aruba tabata tin cu su bishitante nan y e nivel di entretenimento, e conexion, no ta mesun cos mas tampoco.”
