Ayera mainta Museo Historico a habri pa publico cu musica di dande y tambe cuminda crioyo y artesania local.
Nos por a tuma nota di un bon ambiente durante e museo su apertura despues di Pasco, cu un cushina bon surti di cuminda crioyo y artesania local pa acompaña e museo su exposicion usual di Ofishi y otro aspectonan historico di nos isla. Algo cu a falta e biaha aki manera ta normal pa e museo su Bon Bini Festival tur diamars tabata e presentacionnan di artistanan y poetanan manera e conoci Beach y Mo.
Artista Beach en particular ta conta su audiencia regularmente tocante un aspecto cu hopi biaha ta wordo neglisha den e consenshi colectivo: esclavonan na Aruba. Beach ta conta storia di un persona cu a rebeldia contra sclavitud den su tempo, esta Virginia Dimentricia. Despues di a rebeldia sra. Dimentricia a wordo cera den Fort Zoutman, unda e museo historico actualmente ta situa, unda el a haya e castigo maximo pa su acto.
Aunke e aspecto aki a falta, particularmente grupo di turistanan a bishita e museo ayera. E grupo di persona local no tabata mucho grandi. Artesano Sandra Quandt a conta Bon Dia cu aunke no tabatin mucho hende cu a pasa museo, nan ta aprecia cu hende a contesta e yamada di e museo pa bishita. E artesano a expresa cu e no por keha, mirando cu su benta a bay basta bon pa un dia cu no ta spera un acogida grandi.
Un grupo di turista a conta Bon Dia Aruba cu nan ta contento di pasa un dia den famia pa asina haya sa mas di Aruba su cultura y historia. Un comentario constructivo cu nan a laga pa e museo tabata cu nan ta spera cu mas artista local lo haya chens pa expone na e museo. E parti di artista local tabata loke a hala nan atencion mas, cu e museo su weaving expo titula Ofishi.
