Por a compronde cu museonan bao guia di Fundacion Museo Arubano ta cera for di algun tempo caba door di e situacion di pandemia di Covid, supuestamente.
Den un combersacion di redactor di Bon Dia Aruba cu un fuente anonimo, el a sigura cu durante un paseo den centro di e capital pa conoce mas di Aruba su historia, el a haya e sorpresa desagradabel ora cu el a mira un (persona) adicto ambulante purbando di bula cura pa drenta Fort Zoutman. Segun e fuente aki a expresa, el a papia cu e persona ambulante kende a bisa cu e fort y museo ta su hogar nobo ya pa basta luna, ya cu e no ta accesibel mas pa publico, y a sigura cu esaki a bira su cas.
Den e combersacion aki a sali afo cu varios ta e ambulantenan den e area di Oranjestad cu ta haci uso di “proteccion” di Fort Zoutman pa por “haci nan cosnan” for di bista di hende.
Esaki a lanta un preocupacion enorme cerca e fuente manera el a conta, pa varios motibo.
Cuminsando cu e forti aki, cu ta inclui e toren di Willem III, ta un monumento y icono historico y un simbolo importante pa nos capital. Probablemente esun di mas importante.
Den dje nos por encontra tambe Museo Historico Arubano cu ta un di e museonan di mas bieu riba nos isla. Esaki sigur ta contene un coleccion valioso, probablemente miyonario, cu ta conta e storia con nos habitantenan di pasado tabata biba. Algo importante pa nos localnan y tambe pa e turistanan, unda te ainda no tin conocemento si algun di e ambulantenan aki a logra horta algun articulo antiguo.
Ta importante tanto pa Fundacion Museo Arubano (FMA) como pa Ministerio encarga cu Cultura informa publicamente kico a pasa cu e museo aki, y tambe cu Community Museum den Nicolaas Store na San Nicolas, cu tambe ta cera pa turistanan pa basta tempo y cu awor ta un luga di bebe koffie so. Aki tambe redactor di Bon Dia Aruba a haya sa cu turistanan tin interes di drenta na e luga pa aprecia loke tin paden, pero e ta cera pa publico.
