(NLTimes)—E Museo di van Gogh ta celebra su 50 aniversario na 2023. E museo na Amsterdam lo cuminsa e aña cu un homenahe na e famia di Vincent van Gogh (1853-1890). E exhibicion “Choosing Vincent. Portrait of a Family History”, cual lo habri su porta cuminsa diabierna, lo conta e historia di e museo su comienso y e rol cu e famia di van Gogh a hunga den esaki.
Segun e museo, e ta un storia personal “yena cu momentonan di duda, fracaso, orguyo y triunfa,” traves di e wowonan di e artista mes, pero tambe di su ruman Theo y otronan. “Danki na e apoyo di su ruman Theo, Vincent por a desaroya pa un artista innovativo. Otro miembro di e famia van Gogh a sigura cu e coleccion famoso di e museo di van Gogh ta accesibel na tur hende,” e museo a bisa, cual a habri su portanan pa publico riba 2 di juni 1973.
E exhibicion ta mustra piesanan famoso y esunnan menos conoci. Obranan di arte di e contemporaneonan di van Gogh, documentonan desconoci y obhetonan di famia tambe ta exhibi. E pintura di ‘Almond Blossom’, cual van Gogh a pinta como regalo di nacemento pa su sobrino cu ta carga mesun nomber, ta central den e exhibicion. E Vincent van Gogh aki, tambe conoci como “e ingeniero”, a contribui hopi den e desaroyo di e museo.
E exhibicion ta cuminsa cu e hubentud di Vincent na Noord-Brabant. Despues ta pone atencion riba su añanan como artista na Paris, unda el a biba cu su ruman Theo. Theo no a solamente keda cu Vincent su obranan, pero a sigui colecta arte di e contemporaneonan di Vincent.
Ademas di e exhibicion di e famia van Gogh, e museo ta organisando un fiesta grandi riba e Museumplein na Amsterdam pa dia 2 di juni. Dos otro exhibicion grandi dedica na e aniversario tambe ta planea pa e aña aki. ‘Choosing Vincent’ ta cuminsa for di 10 di februari te cu 10 di april.
