Museo di Comunidad ta habri pa pueblo diabierna awor

“E no ta solamente pa adulto pero specialmente pa muchanan tambe. Bon oportunidad pa cera conoci cu nos pasado, cu e forma con nos bisawelo y welonan a biba”, asina Anky Vrolijk, director di Fundacion Museo Arubano a indica. Nan ta masha entusiasma pa nos dia nacional, unda ta habri di 10:00am pa 4:00pm pa yama pueblo bon bini. Claro cu lo tin un bar y cushina bon surti.

Museo di Comunidad tin un exposicion grandi di artefactonan di hopi tempo pasa cu den hopi caso no ta wordo uza mas, pero tambe ta rico na herencia cultural cu nos a conoce di hopi tempo pasa, manera por ehempel “Dera Gay” cu ta bini di nos historia pero cu ainda ta biba den comunidad. Den artefactonan di antes por pensa riba mashin di cose, boternan di refresco di e tempo aya, mueblenan pa cas, hermentnan cu tabata uza e tempo aya. E contenido den e museo ta amplio y tin artefactonan di mas cu 100 aña bieu.

“Nos museonan ta conta nos algo di nos pasado y den e dianan aki, ora cu nos ta celebrando 30 aña di nos Status Aparte y 40 aña di nos Himno y Bandera, ta ideal pa enfoca riba nos historia”, asina Anky Vrolijk a enfatisa. Diariamente scolnan ta bishita e museo y muchanan specialmente ta keda masha impresiona cu e contenido, di artefactonan cu nan no ni sikiera conoce of imagina cu nan bisawelonan a uza den nan tempo. Claro e splicacion detaya di e guia eyden ta percura pa nan compronde na un forma facil y lihe.

Fundacion Museo Arubano ta trahando den colaboracion cu e facultad di “Organization, Governance and Management” di Universidad di Aruba pa yega mas cerca di comunidad di San Nicolas, den un esfuerso pa acomula mas informacion basa riba historia real y tambe articulonan cu famia tin den nan coleccion priva. E studiantenan lo tey diabierna awo pa topa cu pueblo y pa tuma mas informacion posibel.

Museo di Comunidad ta habri den forma temporal desde 14 di maart 2013 den anticipacion pa su apertura oficial den Nicolas Store ora e keda cla. E museo ta situa actualmente den Van Slobbestraat z/n net banda di CMB San Nicolas y ta habri di diamars pa diabierna for di 10:00am pa 5:00pm y diasabra entre 10:00am pa 2:00pm.

E structura di Fundacion Museo Arubano ta data for di aña 1992, pero na 2015 a conoce cambionan structural cu ta haci posibel pa pone 5 museo hunto bao di un organisacion. Ta trata aki di e Museo Historico (Fort Zoutman, Oranjestad), Museo Arkeologico (Ecury Complex, Oranjestad), Museo di Comunidad (Nicolas Store, San Nicolas), Museo Industrial (Watertoren, San Nicolas) y Museo di Carnaval (San Nicolas). Museo di Comunidad y Museo Industrial ta programa pa habri na aña 2016 y Museo di Carnaval lo habri na 2017.