Museo di Comunidad su exposicion di inauguracion ta yama San Nicolas Estetic

Curator y director artistico di Fundacion Museo Arubano (FMA), Sr. Renwick Heronimo a declara na Bon Dia Aruba cu nan ta trahado arduamente pa asina pronto e Museo di Comunidad lo habri su porta oficialmente den e edificio monumental y totalmente renoba conoci como Nicolaas Store na San Nicolas.

Ya FMA a ricibi e yabi y actualmente nan ta den e proceso final di traha riba detayenan di instalacion di e exposicion pa habri e museo aki mas pronto durante e dos mita di 2017. El a bisa cu FMA ta un fundacion hoben den proceso di construccion y cu ta creciendo.

Museo di Comunidad
Heronimo a describi e Museo di Comunidad cu ta na caminda como uno cu ideanan hopi diferente, hopi interactivo, y un museo cu ta bay ta habri mas cu usual. “Kiermen e ta un espacio cu ta bay tin hopi lectura, nos ta pensando riba tipo di festival cu lo por bin manera Afrocaribense, Caribense, musica….”, el a bisa.

E artista a indica cu e proceso pa habri nan exposicion den e museo nobo aki ta bayendo riba bon caminda. Ta asina cu pareu cu e investigacion di e Museo di Industria, nan a cuminsa cu un serie di actividad cu tabata un “food for thought sessions”. Esaki tabata un actividad cu a reuni 30 persona cu ta activo den e ramo cultural, social, musical of/y critico di pariba y di Aruba en general pa bin cu proposicionnan pa habri e exposicion di inauguracion cu ta yama San Nicolas Estetic.

“E motibo di esey ta cu nos ta sinti cu e parti pariba di Aruba tin un caracteristica hopi particular y hopi autentico”, el a bisa. E parti aki di San Nicolas a mantene su originalidad apart di tur e transformacion cu nos isla a biba na momento cu nos isla a haya e impacto di nos industria turistico. E intencion inicial tabata pa kies 10 proposicion di e 30, pero nan tur tabata asina bon cu nan a dicidi di acepta 20 proposicion. El a elogia y balora e trabou cu nan a realisa. “Tur 20 ta asina valido y asina bon cu nos a dicidi cu tur 20 ta haya un momento den e museo”.

No ta un tarea facil mirando cu Aruba ta un isla multicultural y cu a su bes ta crea un comunidad so. E ta destaca cu for di punto di bista di su trabou como curator, e tabatin su dificultad; ya cu e ta sinti cu e no por dicidi su so riba un Museo di Comunidad. P’esey nan a bin cu un sistema mas democratico y habri pa 20 proposicion.

“Loke mi a haci como curator tabata duna e food for tought sessions. Nos a fit e grupo cu ideanan. Ideanan cu ta splica cu cada persona ta trece un proposicion pa e Museo di Comunidad”, el a bisa. Esencial di e proyecto ta e resonancia cu e museo aki por haya den comunidad. Cu ora nan ta drenta nan por sinti cu nan ta forma parti di e comunidad aki. “Sino e no ta un proyecto valido pa e museo aki”. Esaki ta e aceptacion cu Museo di Industria tin, caminda e publico ta reconoce historia aki como parti nan historia.

San Nicolas cultural
E tin cu bisa cu e cifra di bishitanan ta creciendo constantemente na Museo di Industria, aunke e ta reconoce cu e ta un proceso gradual y cu mester dun’e un tiki su tempo. Te ainda nan no a bin cu un campaña masivo di publicidad pa promociona e museonan na San Nicolas. Nan ta wardando pa habri e Museo di Comunidad pa bin cu un promocion amplio di nan. Pues e ta sinti cu San Nicolas ta birando un destinacion alternativo pa Aruba, y cu e lo keda crece.

E ta pronostica cu e elemento cultural cu San Nicolas ta ofrece alternativamente na e aspecto di playa, beyesa natural, etc. lo bira den cuestion di un par di aña algo exitoso pa Aruba su turismo. Tambe FMA lo tin un proyecto hopi ambicioso di expansion pa Museo Historico na Oranjestad. Of tambe den otro districto na Aruba, eventualmente algo relaciona cu e sector primario di agricultura.

Museo di Comunidad no ta bay refleha riba cosnan cu no ta existi mas, sino cu intencion tras di dje ta di hala bo atencion riba cierto partinan autentico y unico di pariba cu bo no kier bay perdi. E ta destaca cu e caracteristica aki ta e bunitesa di e comunidad di Aruba cu ta su multiplicidad y su sincretismo, caminda bo ta haya tur e elementonan cu ta bin forma e comunidad aki. “Tambe San Nicolas ta tipifica esey”, el a laga sa. Den cierto forma e industria di refineria na San Nicolas a forma e Aruba cu nos tin awe.

San Nicolas ta un parti di e isla ta un como mas isleño Caribense. E tin un cultura mas Afrocaribense cu e resto di nos isla, cu e ta considera cu ta un balor agrega y un rikesa masha particular pariba di brug. Nan a traha riba e potencial aki, y nan a pidi tur e participantenan den e food for thought sessions pa bin cu proposicionnan cu ta bay accentua, kico di elementonan tin di e parti aki di nos isla cu ta refleha nan autenticidad. Of elementonan cu nan no kier pa bay perdi den cualkier desaroyo cu por bin den futuro.

Proposicionnan
Inicialmente di 20 proposicion acepta, nan ta bay habri cu 10, y cada aña nan ta keda agrega cierto componente, mientras cu otro ta keda sali. Heronimo a laga sa cu tur proposicion den e transcurso di 5 aña ta bay haya su momento den e Museo di Comunidad. Nan ta proposicionnan totalmente diverso, algun ta referi na migracion, aspecto tipico culinario. Tambe un proposicion tin di haber cu un investigacion rond di e nomber San Nicolas. E no kier bay den detaye riba e proposicionnan pa no kita e aspecto di sorpresa, ora cu nan ta inaugura e museo. Tambe tin proyecto interactivo cu lo haya un luga den e museo aki. Den e sala central lo bay tin un cu ta yama e Mapa di Memoria di San Nicolas. E ta habri oportunidad pa e persona mes por agrega algun memoria haciendo uzo di un sistema cu tur hende lo por comparti.

E parti dilanti lo bay bira e cafetaria habri pa publico. Tambe nan tin otro proyecto manera un social food , e ta consisti cu tur luna lo organisa un cena. Cada cena lo tin su tematica y cada tematica ta bay crea un archief cu lo wordo presenta den e museo mes.

Heronimo ta haya cu e monumento restaura di Nicolaas Store ta un luga icono pa San Nicolas y cu hopi balor sentimental. Pa condiciona e sitio, recientemente un persona a rescata varios artefacto original di e tienda aki; pero esencia di e museo ta esun di presenta 10 punto di bista. E intencion segun Heronimo ta esun di crea un dialogo y reflexion. Pa stimula e persona di pariba mes bay pensa riba kico nan tin, y cu nan ta e prome yama pa cuida nan cu tin un balor special cu ne.

“Hopi biaha nos no ta realisa cu por ta nos tin asina hopi balor cultural cu ta e caso di pariba y cu si bo no ta cuida, por ta den 10 pa 20 aña, e ta disparce via di otro desaroyo cu lo por bin”, el a laga sa.

Inicialmente nan kier a cuminsa cu un exposicion di musica; cu ta algo cu ta wordo biba pariba. Pero nan a laga e aspecto aki pa despues, ya cu nan lo traha tambe riba e Museo di Carnaval, y musica lo ta un parti esencial di dje.

Heronimo a conclui bisando cu e proyecto aki tin tres capa den e manera cu e ta wordo presenta: Un ta e capa curatorial caminda e Museo lo trece 20 perspectiva den 5 aña. E di dos capa ta consisti cu cada un di nan lo tin su propio narativa of historia di dje. E di tres capa ta cu nan ta bay traha cu e mesun diseñador cu ta un specialista den museologia cu ya caba nan a traha cu ne pa e Museo di Industria. E ta encarga pa pone tur cos den escena den e exposicion aki. E tres capanan aki lo contribui pa e Museo di Comunidad lo ta un museo hopi dinamico.