Museo Auschwitz ta protesta uzo di imagen di e campo den moda

Auschwitz Memorial and Museum a keha na un website di e-commerce cu ta bende mini- saya, tas, y otro producto cu ta mustra potret di e ex- campo di morto Aleman, unda como 1.1 miyon di persona a ser asesina durante Segundo Guera Mundial.

E museo na Polonia a haya sa di e productonan ofreci riba e website Australiano, Redbubble, for di hende cu a mira esaki online, vocero Bartosz Bartyzel a bisa diaranson.
Empleadonan tabata ‘den shock y rabia’ tocante locual nan ta considera deshonor iresponsabel di e victimanan di Holocaust, el a bisa.

E productonan cu a causa ofensa a ser crea pa varios diseñador y tabata mustra imagennan blanco cu preto post- guera di Auschwitz y e track di trein hibando na e campo di exterminacion Brikenau y su camaranan di gas. Un tas cu un signo di advertencia den Aleman na Auschwitz tabata ofreci pa 13.90 euro, un saya cu un imagen di Auschwitz pa 35 euro, y un cusinchi pa 40.29 euro.

Redbubble ta permiti artistanan crea diseño pa t-shirt y otro producto traha di tela y bende esaki directamente na publico online.

Como contesta na e protesta di e museo, Redbubble a tweet: “E naturalesa di e productonan aki no ta aceptabel’, y cu tabata tumando ‘accion inmediato pa elimina esaki y productonan similar disponibel riba e sorto di productonan aki’.

Bartyzel a culpa e comercialisacion di Holocaust y uzo inapropia di imagennan di campo di morto riba un ‘falta di sensibilidad, descuido, talbes algun biaha un forma di provocacion’. Educacion constante tocante Auschwitz-Birkenau, y reaccion rapido ta e miho prevencion, el a bisa.

“Cu suerte, e compania cu a haci e productonan disponibel a reacciona di e forma corecto, y nos a mira e productonan elimina”, Bartyzel a bisa.

Auschwitz Memorial a tweet pa gradici Redbubble pa nan mensahe y raccion.

For di 1940-45, cerca di 1.1 miyon persona, mayoria hudiu pero tambe Polaco, Gitano, prisoneronan di guera Ruso y otronan a ser mata den e camaranan di gas of a muri di hamber, labor fuerte, y malesa, na Auschwitz-Birkenau, e compleho di campo di concentracion, labor forsa y morto cual Alemania Nazi a opera den un Polonia ocupa.