Apertura di Caribbean Ties Aruba lo bira e prome exposicion organisa na Museo Arkeologico di Aruba (MAA), despues cu su instalacion monumental a keda cera pa mas cu dos aña. Esaki ta e di dos exposicion internacional cu ta tuma luga na MAA.
Suzette Boekhoudt, kende ta lider di e proyecto Caribbean Ties Aruba, a declara cu e exposicion aki, cu lo ta tuma luga dia 22 di mei pa 6:30 atardi na MAA, ta e finalisacion di e proyecto NEXUS 1492, cu a wordo guia pa Universidad di Leiden a base di un investigacion haci pa varios aña den e region Caribense. “Naturalmente cu e Caribbean Ties, museo no ta cera mas. Nos tin e exposicion aki pa un y tur por bin presencia,” asina Boekhoudt a declara.
E ta un exposicion cu lo wordo exhibi pa un aña na MAA, pero ta existi e posibilidad cu nan lo por extende pa mas tempo. E ta un expo cu tanto hende local como turista lo por bishita, y e lo ta na Ingles y Papiamento. E turistanan y hendenan local cu ta bishita e expo aki lo haya informacion hopi valioso, no solamente di Aruba, pero di region Caribe.
Kier men muy pronto e museo aki, cu a pasa den un proceso di reparacion di nan sistema di airco y infrastructura, lo anuncia cu lo ta habri pa publico bek. Actualmente, MAA no tin director, tampoco e no ta cay den man di Fundacion Museo Aruba (FMA) cu ta encarga cu e maneho di e otro museonan existente. Pero a keda anuncia cu ministerio di Cultura, caminda MAA ta resorta, ta percura cu pronto e nombramento aki lo cay.
Aunke nan sala di exposicion di MAA ta cera, nan ta sigui activo di otro forma, entre nan trahando pa bin cu e expo Caribbean Ties Aruba. Tambe riba e publicacion cu e fundacion 1403, cu a percura pa bin cu e exposicion aki, ta bay saca pronto. Igualmente nan a sigui duna informacion riba nos rikesa arkeologico na nos muchanan di scol.
Na Aruba nan a haci investigacion tocante e indjannan di Caribe, prome y despues di e encuentro cu e hendenan cu a bin di Europa. E mesun exposicion aki ta tumando luga den otro islanan di nos region, entre nan, Republica Dominicana, Grenada, Martinique, etc., pero cu e aspecto caracteristico di cada isla.
