Actualmente Museo Arkeologico Aruba (MAA) ta cera debi cu trabou grandi di instalacion di un sistema di airco nobo ta tumando luga den full e facilidad. Ademas, aparentemente nan a probecha e temporada aki pa realisa algun trabou di mantencion di e edificio monumental aki.

Sinembargo ya pa varios luna caba e museo aki masha bishita ta permanece cera, sin por brinda su servicio na publico. E ta un di nos atraccionnan nan grandi cu nos tin pa ofrece na nos turistanan den centro di ciudad. E museo aki tin un exposicion valioso y bunita presenta di nos antepasadonan. Tambe su edificio ta un joya arkitectonico.

E combinacion aki ta haci di nos Museo Arkeologico di Aruba un di e museonan mas importante di nos region. Pero e dianan ta pasa sin cu ainda no tin mucho claridad pa ki fecha e museo aki ta habri bek. Bon Dia Aruba a tuma contacto cu MAA pa purba di haya mas informacion riba e desaroyo di e trabou cu ta tumando luga y asina por haya un bista riba ki fecha eventualmente nan lo habri bek. Pero te ainda nos no a haya niun reaccion di nan.

E inkietud aki tambe ta bin di esunnan cu ta atende cu bishitantenan cu ta desea di conoce mas di e pasado di nos pueblo. Un di e bishitantenan aki ta e turistanan crucero cu durante e ultimo añanan nos a yega di conoce un aumento di nan. E turistanan aki generalmente durante nan breve estadia riba nos isla ta recore e area di centro di ciudad.

ATA Crucero
Durante e Cruise Symposium Aruba 2017, Mario Arends kende ta Cruise Manager di ATA (Oficina di Turismo di Aruba), a declara na e matutino aki cu MAA ta un parti importante di e aspecto cultural y historico di experiencia di nos turistanan. “E ta hopi cerca di e puerto di crucero”, el a bisa.

Considerando e interes grandi di MAA pa nos turismo, ATA ta presiona pa e museo lo por habri su porta pronto. Sr. Arends tin entendi cu e proceso di e trabou cu ta tumando luga den e instalacion di MAA ta canando. “Pa nos si e por keda cla mas lihe cu ta posibel, sigur!”, e director di ATA ta expresa.

ATA su seccion di turistanan di crucero no ta laga afo cu tambe e otro museonan y aspecto di interes cultural y historico di nos isla tin su importancia pa nos turismo. Tanto na Playa pero tambe na San Nicolas unda nos tin e Museo di Industria y e Community Museo y otro sitio di interes pa nos bishitantenan cu ATA lo sigui pusha keto bay.

Aruba Walking Tour
Marc Benson Denz kende ta director di Aruba Walking Tour a declara na Bon Dia Aruba cu e echo cu e MAA tin varios luna cera caba ta afecta nan bastante pasobra e ta un di e puntonan di atraccion cu mas hendenan ta gusta. Den nan promocion nan tin potretnan tambe di e hendenan den e museo. E ta haya cu e ceramento largo aki ta afecta nos turismo, ya cu e ta parti di e tour cu e turista ta spera di bishita durante nan estadia riba nos isla. “Hopi comentario di turistanan cu a bin y a bay e museo a papia con bunita e museo ta. E ora ey e turistanan nobo kier drenta wak’e”, el a bisa.

Un interes grandi cu nan tin –segun Sr. Denz- ta cu nan kier siña di nos prome habitantenan y esaki ta loke netamente nan tin den e museo aki, aparte tambe cu e museo ta bunita y e historia tambe ta rico.

Igualmente el a indica cu e MAA ta riba nan ruta kiermen cu obligatoriamente nan tin cu pasa dilanti di nan edificio, pues obligatoriamente nan tin cu splica e turistanan aki cu e museo ta cera y logicamente nan ta keda cu gana di wak’e.

E no comprende e tardansa aki. “E ta bastante luna cu nos ta bisando nan cu e ta cera”. Pues e ta haya cu e trabou cu ta tumando luga den e museo ta basta largo caba. E contesta cu nan a yega di haya di e situacion di e museo ta e mesun problema di airco. Tin biaha cu nan ta pasa ey banda berdad nan ta ripara den algun ocasion cu tin un van di un compania di airco para dilanti di MAA, pero e no sa berdaderamente dicon e ta tumando tanto tempo asina.

Ta supone cu e trabou di airco aki lo dura 3 pa 4 luna, pero e ta birando casi un aña.