problema di musca Br (1).JPG

ORANJESTAD – Den e dianan aki musca a bira un problema rond di Aruba. Bo no por haci un actividad social di comemento den bo cura di cas pasobra di biaha un batayon di musca kier bin para riba bo cumindanan. Tur hende a cuminsa keha y nan no sa unda nan por bati porta pa atende cu e problema aki.

Bon Dia Aruba a tuma contacto cu Gele Koorts Muskiet Bestrijding (GKMB) keriendo cu ta nan esun cu ta carga e responsabilidad di combati e tipo di insecto indesea aki. Sinembargo GKMB a punta dede den direccion di otro departamento, esta Departamento di Higiena cu awor ta carga e nomber nobo di Dienst Warenkeuring en Hygiene.

Directora di e departamento aki Yvette Geerman ta bisa cu e parti di musca ta keda un problema specialmente den e ideanan aki, considerando cu awa pisa a cay recientemente. Ademas pa motibo di e musca ta trece e parti no higienico ya cu e musca ta un cargado di diferente tipo di bacteria. “E ta carg’e na su pia na su boca y e por causa diferente malesa, ya cu e ta para riba caminda indesea, y e ta transmiti riba bo cuminda. E ta keda un problema.” 

Sra. Geerman a indica cu ta notabel cu den e dianan aki tin hopi musca, ya cu tin hopi factor cu por hunga un rol entre nan awasero pa e muscanan t’ey. Pa nan ta bira dificil pa combati efectivamente. Tiramento di sushi Encuanto sitionan publico of tereno habri caminda hendenan iresponsabel ta tira sushi cu ta un factor pa criadero di musca, Sra. Geerman ta haya cu e ta un situacion cu mester wordo carga conhuntamente entre otro cu Serlimar. Di otro banda, ora cu e ta un luga publico, nan no sa kendenan ta e persona apunta como responsabel. “E ta bira dificil pa nos por sa y soluciona.” Pero si e ta sosode riba un tereno priva, e ora ey e doño ta bira e responsabel pa mantene su tereno limpi.

Sinembargo e ta haya cu comunidad mester ta critico pa wak kendenan ta esunnan cu ta tira sushi y haci denuncia. E ciudadano mester bira consciente pa denuncia e hendenan cu ta deshaci di nan sushinan riba tereno bashi of publico. E ta haci un yamada pa denuncia nan, ya sea cu City Inspector y/of Serlimar, cada un riba nan tereno, pa por atende cu e situacion aki. Sra. Geerman ta declara cu e colegialidad entre e departamentonan concerni t’ey, ya cu nan ta traha den conhunto ya cu nan ta kere cu trahando hunto nan por logra hopi mas pa comunidad.

Consehonan

E ta bisa cu como departamento di Higiena ta dificil pa nan por combati e problema di musca rond di Aruba. “E musca ta busca cuminda. Unda nan ta haya cuminda eynan nan ta bay para.” Departamento di Higiena por duna cierto conseho riba parti preventivo. Un di nan ta pa wak rond di bo cas si bo no tin na e momento ey un resto di cuminda. Si bo tin saco di sushi cer’e nan bon y bent’e afo. Haci bo semper bo baki di sushi limpi y evita sushedad rond di bo cas manera e musca por keda para eynan. Si bo tin cuminda afo ta nan bon. Percura cu e resto di cuminda ta wordo benta di biaha den bari di sushi y deshaci di dje mas lihe posibel.