Un hende ta cambia mundo?
Historiado den futuro lo tin e tendencia di dividi historia den e fase prome y desde cu Trump t’ey. Ta increibel pa mira con e medionan di comunicacion na Merca ta sigui tur e acontecimentonan a diario, y no solamente esunnan cu ta contra e presidente. Den e dianan aki, despues di e ultimo hazaña di kibra cu e acuerdo di Paris encuanto cambio di clima, hasta medionan conservador manera Fox News a keda mal sorprendi cu e paso cu nan amigo a tuma. Riba esey ta bin henter e asunto di metemento di Rusia den eleccion y pio ainda, den gestion gubernamental na e nivel mas halto, cu a haci cu e palabra magico ‘impeachment’ ta riba escenario caba. Asina leu cos no a yega si, aunke cu nunca un presidente a yega di causa tanto boroto den e prome 100 dianan di presidencia.
Pero, bolbiendo na e asunto di e acuerdo di Paris: di berdad ta asina cu Merca ta perdiendo su liderazgo den e mundo aki? Di berdad nan ta laga esaki pasa den man di nan rivalnan di China? O nan ta bay duna mas espacio na Rusia pa nan hunga mas wega ainda? Di berdad, un homber, bon di cabes of no, por cambia mundo? Honestamente, nos ta kere cu no. E por haci daño, na su pais, na paisnan aliado, na relacionnan sano internacional, pero e no por cambia mundo. Laga nos ilustra pakico, y pakico mester tuma henter e fenomeno Trump aki cu un poco mas calma.
Mientras cu e reaccionnan di mundo henter ta resona den tur medio di comunicacion, ta importante loke ta pasando, un par di minuut caba despues cu e prome mandatario a bisa mundo cu e no ta participa mas. E reaccion mas importante a bin di su pais mes, unda gerentenan di empresa grandi y hopi hende di su partido cu a apoya su posicionnan sin vacila, awor ta tuma debido distancia di nan presidente. Hopi reaccion a bin tambe riba e discurso cu Arnold Schwarzenegger a dirigi na Trump, mustrando cu tin realidad, den su mes pais, cu e no por para ni cambia. Y berdad, estado California tin un bida di su mes. E ta e di seis economia na mundo y pa decada caba tin su mes maneho ambiental, unda tin reglanan special pa vehiculo, cu ta bay mas leu cu e otro estadonan. Y a pasa loke Trump ta teme? Nan a perde empleo na miyones? No, al contrario, nan ta prospera mas cu e otro estadonan.
Den e presentacion Schwarzenegger ta pinta Trump manera cu e ta: un lider cu ta wak patras, cu kier bolbe na e pasado di mina di carbon como futuro pa e pais cu awe ainda ta lider economico mundial den hopi aspecto. Hasta Gran Britania a despedi di su minanan di carbon tanto decada pasa, tempo di Margaret Thatcher. Schwarzenegger a haci Trump un fabor grandi si, e no a menciona e palabra: Trump no ta un lider conservador, e ta un lider reaccionario den e berdadero sentido di e palabra. E no por hiba su pais dilanti, solamente na un pasado cu no tin futuro.
Pero tin mal noticia pe, y bon pa nos. Ni su mes pais no ta warda riba dje, corda otro. E unico cos cu e por logra cu algun pais cu no tabatin tanto gana pa cumpli, awor ta gara esaki como excuus pa no haci nada tampoco. Pero e gran mayoria cu ta tuma e cos aki na serio, ta sigui. Y pakico? Nos por discuti largo o cortico si cambio di clima ta causa pa hende, o e tin un causa natural. Ta sigur pa mayoria di cientifico cu en todo caso man humano a contribui den esaki. Ademas, no ta trata solamente di nivel di lama cu ta lanta, bida marino cu ta muri o cambia, e ta tambe biba den sushedad kimico cu tin un efecto devastador riba salud di bo ciudadanonan, o percura pa un ambiente sano pa nan.
Bon mira, Trump ta scoge pa e bentahanan a corto plaso di ganashi economico, cu su produccion aumenta di carbon, mescos China, by the way, pero ta lubida cu otronan den su pais si ta actua construyendo algo nobo pa mañan. Y nan no tin pakico di warda riba nan presidente. Den poco tempo e ta haci di su mes, di lider un siguido. Si acaso e ta bay t’ey pa hopi tempo, pasobra den su mundo, cu tin e tamaño di su mes cabes, no tin consideracion pa interes di siguridad pa e pais mas poderoso na mundo. Esey nan no ta pordona niun hende.
Y kico nos por siña di tur esaki? Cu nos no mester depende riba hende cu ta cana wak patras. Esey ta e tendencia henter ora den nos campaña electoral, den parlamento tambe den e dianan aki. Si bo menciona corupcion actual, pa cual hende mester haya nan castigo debido awor, inmediatamente nan ta bisa:” si, pero 20 aña pasa nan tambe tabatin un malandro.” Nos por introduci un ‘Trump Award’ pa e hendenan aki?
