Ayera tardi, Evelyn Wever-Croes a bolbe bishita gobernador di Aruba den su rol di formado pa asina dun’e e detayenan riba ultimo desaroyo pa bin cla cu un gobierno amplio di coalicion MEP-POR- RED.

Basicamente no tabatin niun desaroyo substancial for di diabierna ultimo cu tabata e delaster biaha cu el a reuni cu gobernador. E biaha ey, el a laga sa cu eventualmente pa e siman aki lo tin un miho bista riba reparticion di e carteranan entre e tres partidonan cu ta forma e coalicion aki, y asina cuminsa cu e proceso di screening. Pero definitivamente esaki no lo ta posibel prome cu diabierna awor cu lo sinta un parlamento nobo. Nan no lo ta cla cu e formacion di gobierno diabierna awor pa huramenta como minister. Pero sigur pa e fecha ey nan lo ta mas cerca di ta cla.

“Ta importante pa tur hende sa cu mundo no ta caba diabierna si no tin gobierno”, el a bisa.

Ainda nan ta pega cu e trabou duro y nada facil di bin cu un programa nacional di gobierno, cu ta uno satisfactorio pa cada un di e tres partidonan cu ta forma parti di e coalicion aki. E deseo di cada partido ta di por wak den e programa aki e diferente puntonan cu nan tabatin den nan programanan cu nan a campaña cu nan durante eleccion ultimo. El a laga sa cu cada partido tin su deseo y nan ta debati entre nan pa wak con nan ta sincronisa y compromete cu nan.

Puntonan di discusion
E ta bisa cu no ta riba tur punto nan por yega na un sincronisacion facil. E no ta mira cu nan ta un problema, pero ta importante cu e partido por wak esaki den e programa. Sra. Wever-Croes a trece como ehempel cu partido POR kier mira den e plan aki e posibilidad di bin cu un test nacional na nivel di enseñansa. Pero esaki ta un punto cu partido MEP tin cu discuti entre nan mes y te hasta cu e veld di enseñansa pa no compromete riba algo prome cu despues ta resulta dificil pa ehecuta.

P’esey den nan deliberacionnan nan ta pidi pa cada un duna un splicacion amplio di kico ta e puntonan cu nan kier wak den e programa di gobierno, pa asina nan no pone un cos cu despues ta resulta cu nan no tabata di acuerdo cu ne. Encuanto e punto di legalisacion di cannabis of marihuana cu partido RED a compaña cu ne, formado di gobierno a declara na prensa cu esaki a wordo resolvi caba den nan programa di gobierno. Kiermen nan ta di acuerdo cu legalisacion di cannabis como uzo medicinal pero no como uzo recreativo.

Minister y parlamentario
Tambe el a laga sa cu nan ta consciente cu diabierna awor lo instala un parlamento nobo. Nan deseo tabata cu riba e mesun fecha lo tin un gobierno nobo, pero na no a alcansa. El a informa cu seguramente nos lo mira pa ehempel, Richard Arends asumi su funcion como parlamentario, aunke ainda e ta sigui como minister te maximo 3 luna. Pues e por keda den e dobel funcion aki, te ora cu e formacion di e gobierno nobo lo bin cla. E gobierno demisionario sa cu no por tuma decision di embergadura durante e temporada aki.

E ta algo cu e mes no lo desea cu e situacion aki lo dura mucho largo, pero di otro banda e ta haya cu no tin motibo pa ansha. E ta consciente cu e proceso aki ta tumando hopi tempo pero nan kier haci bon y pa tal motibo e ta pidi un tiki di pasenshi. Unabes cu nan lo bin cla lo bini cerca gobernador riba e resultado pa e por trece su opinion.

Sinembargo el a trece dilanti cu como formado el a reuni cu diferente otro instancia y un di nan ta departamento di Recurso Humano (DRH) cu a lag’e bastante preocupa, ya cu tin un cantidad di hende cu gobierno kier pusha pa aparato gubernamental den e ultimo dianan. E ta lamenta esaki, ya cu nan ta hunga cu sentimentonan di hende. Pasobra nan sa cu no a regla e papelnan di e hendenan aki na tempo y nan no sa si nan ta bay haya pago. E ta haci un apelacion pa e gobierno demisionario, pa no sigui haci e cos aki, pasobra nan ta hungando cu sentimento di hende ya cu nan ta haci e hendenan aki mas daño di loke nan ta yuda nan.