Mundo henter ta bou mal tempo, pero kico nos ta bay haci?

Mi hendenan, temperaturanan ta sigui subi, zomer ta bati na porta, salud ta bon, mi no tin un guy kiermen mi no tin dolor di cabes y aun asina den tur e bendicionnan curason, ta sinti pisa. Ban papia!

Mi no ta kere mester splica precisamente pakico curason ta pisa, pero entre e guera na Syria, e dictadura na Venezuela, atentado na Suecia, delincuencia na Aruba, e ta duro pa celebra bida mientras tin tanto sufrimento rond. Hende ta comparti videonan di muchanan muriendo riba Facebook manera cu e imagennan no ta fuerte suficiente pa tira nos tur den un estado di impotencia y depresion.

Ami, ki nan bon leu di tur locual mi stima, mi no por ni bay hunga cu mi primanan chikito y laga nan inocencia distrai mi tristesa. Tira riba cama ta pensa riba Aruba, podise coy un buki lesa lo ta mas saludabel cu keda wak Facebook y Twitter purbando di ‘keep up’ cu un mundo cu ta parce di ta un ticking bomb. Geert, Donald, Putin, Le Pen, Assad, politiconan tur rond di nos ta tirando mundo den un estado di panico. Y anos? Sinta wak sin por haci mucho pasobra ta ken ta bay pone nan bida den peliger intencionalmente?

Mi a bay haci un poco research riba kico precisamente ta pasando y na lugar di haya un imagen mas cla pakico tin tanto conflicto y guera ma haya mi mes mas confundi ainda. Hulanda ta un pais sin gospel, kinan niun hende ta papia di Dios pues te hasta resa ta sinti straño. Pero bandi mi cas tin un moskee, esta un misa islam, asina bunita e parce un mini kasteel. E ta pone mi desea cu mi tabata un muhe di fe, cu di berdad mi tabata kere den un Dios cu lo drecha tur cos. Aparentemente e guera na Syria ta un profecia den bijbel. El a wordo bisa cu Damascus cual ta e capital di Syria lo disparce por completo. Religion ta algo interesante y complica, pero mi ta kere mi lo para den loco si mi bay mucho su tras.

Tin ora, ora mi ta mi so mi ta tribi di soña cu un bida leu di religion, capitalismo, racismo, etc. Leu di e asina yama ‘civilisacion’ y industrianan cu poco poco ta cabando cu nos planeta. E ta zona iluso berdad, pero bo por imagina un mundo sin placa? Sin e presion di ta “algo den bida”, sin wordo husga pa bo productividad. Un bida unda nos unico responsabilidad ta proteha naturalesa y stima otro. Leu di tur e ambicion cu nan ta bisa nos mester tin.

Di berdad, nos ta biba dia pa dia pero nos ta sinta cuestiona con nos a yega na e mundo cu nos tin awor? Nos ta contento cu ne? Cu mester tin malo pa nos por reconce bon, cu mester tin pober pa rico biba? Ken a haci placa mas valioso cu bida humano? Pakico Merca ta bay Iraq cu Afghanistan bringa pa nan libertad? Con nan libertad a yega te eynan? Mi mester poco contesta. Aparte di tur e gueranan y malesanan cu tin para como profecia den bijbel, tambe tin un promesa cu despues di hopi destruccion, algun dia paz lo reina den mundo henter.

Den e dianan aki, unda te hasta hala rosea ta sinti pisa, esey ta un profecia cu podise ta bal la pena kere aden. Podise e siman aki, nos tur por cuminsa na trata otro cu un poco mas amabilidad. Mundo henter, mester amor mas cu nunca. Brasa bo ser kerinan, comparti cu nan, go the extra mile. Gradici cu bo ta sano y salvo, te ainda.