Michi ta un pushi di caya cu ta pasa nos cas entre otro pa sea hunga cu paharito of lagadishi, come cuminda of bebe lechi y awa. E ta custumbra di chikito cu e por drenta cas. Tur mainta e ta presenta na e porta patras di cas, e sa cu lo tin cuminda y awa fresco pa e bebe, djey e ta sea bay bishita e bisiñanan of e ta drenta cas pa descansa su curpa di un anochi yen di aventura. Michi tin su pareha, nos a ripara recientemente cu manera nos pone cuminda pa Michi, e ta core bay busca su pareha pa e bin come hunto cune. E pareha tin banchi y e ta bon comi, pero asina mes e ta yega cas cu Michi pa come. Nos a ripara cu e chick aki ta come asina bon cu e no ta laga nada pa Michi mes, door di esaki nos a busca un baki extra pa e ora Michi toch por come tambe.

Michi sa come cuminda di paki, e ta gust’e masha hopi y tin biaha nos ta dun’e un treat manera pollo a la brasa of bleki tuna. Claro nos no ta dun’e full e galiña pa su so, pero si pidanan cu basta carni pa e haya. Un biaha m’a pone den su tayo e dos hala y pia y el a haci e fout di yama su chick bin come. E tabata come di su baki y diripiente e chick a dal’e cu su pootje riba su cabes pa Michi stop di come. Pober Michi a hala un banda y mira su chick come su pidanan di galiña. E chick a come tur dos tayo lagando solamente e wesonan y un pida cuero pa Michi.

Un otro biaha cu nos a busca roast chicken nos a corda riba Michi y su chick, nos a haci sabi nos a yena e bakinan cu cuminda di paki. Nos a yena un te na top y e otro djis un par di brokkjes y e chick a aparece y di biaha el a bay pa esun mas hopi. Michi a keda wak nos cu un cara manera uno cu a wordo traiciona. Ora e chick a caba di come nos a warda te ora el a bay pa nos duna Michi e roast chicken cu nos a warda p’e. Di leu nos ta tende un desordo ta bin di pafo nos a core bay wak kico ta pasando y ta resulta cu e chick tin e roast chicken completo den su boca y ta core bay cune y pober Michi a keda wak su tayo bashi. Nos a haya hopi pica pa Michi, ken por a pensa cu despues cu e chick a come full e baki di cuminda cu e lo por a bin pa mas cuminda.

Awor e unico cos cu nos por a dun’e ta un bleki tuna. E biaha aki nos a pone e baki paden pa e come trankil y nos ta sinta cune te ora e cab’i come.

Michi tin custumber tur dia di yega na e porta patras unda nos ta pone cuminda y awa fresco p’e. Nos ta laga e porta habri pa e por drenta. Un biaha e porta a daña y no kier a habri y pa mala suerte cuminda a caba y tabatin tiki brokkjes so den e paki; mi no por sinta tira e brokkjes p’e tampoco. E Michi su miaauwnan a bira menos duro, e cabes a bay di banda pa wak mi sinta tras di mi computer y e wowonan mi por a sigura e tabata yena cu desconsolacion. Nos a bin cu un idea di hinca e brokkjes cu salada di galiña den pan, ya asina e brokkjes no ta spart full rond den e veranda patras. Mi ta wak for di mi bentana di camber cu Michi tabata na e porta ta warda pa cuminda y el a bira wak e bentana cu ta habri su tras. M’a tira e pan den e direccion di e porta y increible e pan a bay dal’e na su cabes! Su reaccion tabata busca caminda di sconde, pero el keda wak mi na e bentana y a bay back na e pan benta dilanti e porta. M’a cera e bentana pasobra mi no por lag’e drenta via e camber, si no e lo bira un custumber cu e lo kier drenta via bentana. Ora m’a bay bek patras, mi a wak e pushi a habri e pan y come e salada cu e brokkjes. El a come un tiki di e pan tambe y el a bay. E chick a presenta su so y el a haya pan pa come, pero ya Michi a come tur locual tabatin den dje caba.

Bo tin un storia leuk of pret di bo mascota of otro animal cu kier comparti cu Bon Dia Aruba? Por email noticia@bondia.com.