(Devex) – Un campaña di varios luna di liderazgo Haitiano y Nacionnan Uni pa persuadi Merca, Canada y cualkier otro poder regional pa lidera un forsa internacional pa combati un coalicion di gangnan di caya a practicamente fracasa, generando miedo cu e pais por cay den caos mas profundo, segun diplomaticonan di ONU.
“Nada ta move den e conseho; niun hende tin apetito pa pone trupa of polis den peliger,” un diplomatico senior di conseho di seguridad a bisa Devex. “Tin fatiga di Haiti; p’esey hende ta asina dudoso.”
Linda Thomas-Greenfield, embahador Mericano na ONU, a bisa dia 17 di october ultimo cu “ta nos responsabilidad pa bin hunto pa yuda restaura paz y seguridad pa pueblo di Haiti.” Cuatro dia despues, e conseho a adopta un resolucion, prepara conhuntamente pa Merca y Mexico, pa impne sancionnan financiero, di arma y di biahe contra miembronan di gang responsable pa atrocidadnan na Haiti.
Pero e empuhe di Merca pa manda un forsa internacional ta den limbo.
Washington a preveni introduccion di un di dos resolucion creando un forsa di seguridad internacional pasobra no ta dispuesto pa lidera operacionnan y no ta capaz di sigura otro pais pa hacie.
Mientras tanto, Rusia, cu tin poder di veto den e conseho di 15 nacion, a telegrafia su reservanan, como anfitrion di un sesion di informacion pa e conseho di un activista cu ta opone intervencion stranhero. “Nos tin duda cu e opcion di manda un forsa militar internacional por cambia e situacion fundamentalmente,” embahador Ruso na ONU, Vasily Nebenzya a bisa e conseho na october.
E duda pa manda trupanan stranhero na Haiti ta refleha skepticismo profundisando na Washington, Ottawa y otro capitalnan cu e nacion di menos recurso den Hemisferio Occidental por prospera, hasta cu biyones di dollar den ayudo y sosten di seguridad. Tambe ta trece mal memoria entre Haitianonan tocante e mision di paz problematico di ONU, cual su Helmet Blauwnan a introduci colera na Haiti y a keda vincula na un serie di caso di explotacion sexual.
