Centenares di manifestante a reuni pafo di Ministerio di Interior di Nort Macedonia, cu un yamado pa gobierno ayera tuma accion riba gruponan di mensahe priva compartiendo potret y video no autorisa y hopi biaha explicito di muhe- y muchanan muhe.
E demostracion a yega despues di revelacionnan cu un grupo di chat riba e plataforma cifra Telegram tabata compartiendo potret y video cu mas di 7mil miembro. Algun usuario a post e nomber y adres di e muhe- y muchanan cu tabata aparece riba e video y potretnan.
“Nos ta aki pasobra nos no ta sinti sigur”, Kalia Dimitrova, di 29 aña, un miembro di un grupo local di derechonan humano, a bisa durante e protesta. “Mi ta nenga di acepta cu mi mester sconde ora ta ataca mi… esaki mester caba.”
E grupo di chat riba Telegram, titula Public Room, a keda descubri aña pasa y a reemerge na januari a pesar di siguransa di autoridadnan cu e actividad aki a stop.
Prome minister di Nort Macedonia, Zoran Zaev a menasa siman pasa di blokea Telegram si e compania nenga di duna mas asistencia pa shut down Public Room y otro gruponan similar.
Minister di Interior, Oliver Spasovski a bisa cu recientemente a aresta cuatro persona den conexion cu e caso. E minister no a duna mas detaye.
Varios muhe na e protesta diaranson a bisa cu a horta nan potret for di cuentanan di rednan social victima di hacking.
Un muhe kende a papia durante e protesta y a identifica su mes solamente como Ana a urgi pa autoridadnan introduci legislacion cu lo reduci acoso sexual online y reforsa podernan di polis. “Ta mas cu ora pa esaki caba”, el a bisa e manifestantenan. “Nos mester legislacion pa esaki provee un miho futuro pa nos y pa e generacionnan cu ta bin.”
No a logra haya comentario inmediato di Telegram.
