Un muhe transsexual diahuebs ultimo a muri pa via di un bala di un soldaat ora e tabata biaha den auto cu su pareha na un caretera di Colombia, un accion cu Ehercito a reconoce y a lamenta.
“Nan a mata mi Juliana! e homber ey a tira un bala na su cabes, yuda mi por fabor, yuda mi”, tabata e gritonan di un homber cu tabata graba cu su telefon e muhe morto riba stoel di auto, mientras cinco soldaat tabata rond di e escena.
E episodio, cu gobierno Colombiano a rechasa, a keda graba den un video cu a bira viral y ta coincidi cu e protestanan violento contra abuso di polis cu a sacudi Colombia durante ultimo dianan.
Juliana Giraldo, di 35 aña, tabata den un auto hunto cu su pareha Francisco Larrañiaga, ora diripiente a wak con algun soldaatnan a sali na banda di un caretera cu ta comunica e municipio di Miranda y Corinto, na departamento del Cauca, asota pa violencia y narcotrafico.
Segun e version di Larrañiaga, un di e militarnan a cuminsa tira cu arma di candela contra e auto, aunke el a stop pa via di e orden di e militarnan. “E tabata lo miho cu a pasa na mi bida y Ehercito nacional a mat’e”, el a bisa hopi tristo.
Tercera Division di Ehercito den un comunicado a bisa cu e muhe a muri “a causa di un bala di un integrante” di e forsa ey durante “labor di control”.
E agente uniforma cu a tira a keda “na disposicion” di autoridadnan cu ta investiga “e lamentabel acontecimento”.
Presidente Ivan Duque via Twitter a condena “e horibel hecho”, pa cual “e responsabel mester ricibi un ehemplar castigo. Solidaridad cu e famia di Juliana Giraldo, pa ken nos lo brinda compania”, el a agrega.
