Servicio di polis na Nort Irlanda a bisa cu diamars a aresta un muhe di 57 aña di edad, bou di un acto terorista en conexion cu asesinato di periodista Lyra McKee.
Un grupo arma, rama di ehercito Republicano di Irlanda, a admiti cu un di nan boluntario a asesina e periodista cu un tiro, ora cu McKee tabata raportando un disturbio na Londonderry.
Den un declaracion pa noticieronan local, e New IRA a pidi ‘sincero disculpa’ pa e famia di e reportero. Segun e grupo a informa polis, McKee a wordo mata riba diahuebs, ora e tabata para cu ‘e forsa di enemigo’.
IRA y otro grupo militar a ser desarma desde 1998, tempo cu e pais a haci acuerdo di paz. Pero e grupo nobo a wordo forma di varios diferente grupo, y ta opone na e proceso di paz.
Autoridadnan ta kere cu un persona a tira durante e disturbio caotico cu a cuminsa riba diahuebs anochi, pero tabata conta cu sosten di e grupo. E uzo di arma di candela ta marca un subida peligroso den violencia na e pais, 21 aña despues cu e acuerdo di paz a wordo firma riba un diabierna santo. E New IRA ta rechasa e acuerdo aki.
E disturbio cu a costa bida di McKee a sigui un patronchi familiar pa esunnan cu a biba nan pio aña di violencia na Nort Irlanda. Polis a yega e bario pa busca arma. Nan a wak bom di gasolin y otro obhetonan. Un persona a aparece cu su mascara preto, e la tira y huy. E bala no a yega polis, pero si periodista McKee, cu tabata trata di filma cu su celular e suceso. El a wordo hiba pa hospital, pero a fayece.
