Ketty Maisonrouge, un profesor di comercio di 61 aña di edad, a inscribi na 2005 pa e promesa di cinco minuut den gravedad cero, pagando $250mil pa bay mas leu di atmosfera terestre.

Awo e compania cu a bend’e e ticket, Virgin Galactic, a bisa cu finalmente lo cuminsa vuelonan e aña aki. Su fundado, Sir Richard Branson, lo ta riba e prome biahe, y Maisonrouge no mucho atras.

Si tur cos bay segun plan, Virgin Galactic lo ta e prome compania priva pa manda turistanan den espacio. E compania ta bisa cu 600 persona ya caba a cumpra ticket, incluyendo celebridadnan manera Justin Bieber y Leonardo DiCaprio.

Pero companianan rival ta keda cerca. Blue Origin, di fundado di Amazon, Jeff Bezos tambe a cuminsa papia cu posibel pasahero pa tripnan cuminsa e aña aki, mientras SpaceX, funda pa Elon Musk di Tesla, a anuncia na 2019 cu un biyonario Hapones lo ta su prome pasahero pa un trip rond di Luna.

Na 2019, banco Suiso UBS a revela un reporte calculando cu turismo espacial lo bira un industria na balor di $3 biyon den proximo 10 aña.

Pa Virgin Galactic, cumpradonan trempan manera Maisonrouge a yuda prueba cu e demanda tabat’ey pa biahe espacial priva – hasta cu un ticket di cuart miyon dollar.

“Pa por produci productonan asina caro manera espacio riba mercado na prome luga ta inclui un premium halto”, segun ta splica Julia Hunter, senior vice-presidente na Virgin Galactic.

Desde cu a cumpra su ticket, Maisonrouge a tene su plan mas tanto priva, compartiendo esaki unicamente cu famia, amigo cercano, y otro ‘founders’ – e grupo original di persona cu tin ticket di Virgin Galactic.

Na november ultimo un grupo di nan a haya e prome chens pa pas trahe espacial – diseña pa e compania Under Armour – cu nan lo uza durante nan trip den espacio.

A diferencia di astronautanan den e misionnan Apollo legendario, kende a pasa lunanan di training rigoroso y condicion fisico dificil, Maisonrouge y otro turistanan espacial lo tuma apenas tres dia pa train pa nan trip. Virgin Galactic a bisa cu por ta menos, pero nan kier pa pasaheronan ‘compronde e coreografia’ y ‘ricibi lo mas posibel’ di nan experiencia.

E compania a diseña un terminal na Spaceport America den desierto di New Mexico, ekipa cu bentana for di suelo te plafond pa mira e lansamentonan, un barista pa traha koffie fresco, y un walkway interactivo.

For di e terminal aki e turistanan di Virgin Galactic lo aborda astronavenan pa un trip di 90 minuut cu apenas algun minuut den orbita. Ta un experiencia hopi mas luhoso cu locual astronautanan di gobierno a haya.

Un cuart miyon dollar por parce hopi pa un trip di turista, pero Virgin Galactic ta bisa cu ta spera cu demanda pa biahe espacial lo ta hopi mayor cu oferta, cual por aumenta e prijs di ticket mas ainda.

Shete ciudadano priva ya a paga varios miyon dollar pa ticket pa bay den espacio cu vuelonan espacial Soyuz di Rusia bayendo bek te na 2001, haciendo nan e prome turistanan espacial.

NASA tambe a depende riba astronavenan Soyuz pa transporta astronauta Mericano na Stacion Espacial Internacional (ISS) desde cu a finalisa su programa di shuttle na 2011, pagando aproximadamente $86 miyon per spot.

Vuelonan espacial pa astronauta di gobierno y turista espacial ta apenas un parti di e potencial di industria espacial priva. Biahe cu ta bandona orbita terestre por converti den un sector di $20 biyon pa 2030, segun UBS. Bandonando e orbita planetario, biahe rond mundo por ta hopi mas lihe.

SpaceX ya a revela material di marketing pa un vuelo di 40 minuut for di New York City pa Shanghai, uzando tecnologia di vuelo espacial.